`ஆக்ஸிம் 4’ திட்டத்தின் கீழ் இந்தியாவைச் சேர்ந்த சுபான்ஷு சுக்லா உள்ளிட்ட 4 விண்வெளி வீரர்களை சுமந்துகொண்டு, இந்திய நேரப்படி இன்று (ஜூன் 25) நண்பகல் 12 மணிக்கு டிராகன் விண்கலம் சர்வதேச விண்வெளி நிலையத்தை நோக்கி பயணத்தைத் தொடங்கியது.
மனிதர்களை விண்வெளிக்கு அனுப்பும் `ககன்யான்’ திட்டத்தை 2026-ல் செயல்படுத்தவும், இந்தியாவுக்குச் சொந்தமான விண்வெளி நிலையத்தை 2035-ல் கட்டி முடிக்கவும் இஸ்ரோ திட்டமிட்டுள்ளது.
இதற்கான முன்னோட்டமாக அமெரிக்க விண்வெளி ஆராய்ச்சி நிறுவனமான நாசா, ஸ்பேஸ் எக்ஸ் மற்றும் ஆக்ஸிம் ஸ்பேஸ் ஆகியவற்றுடன் இணைந்து `ஆக்ஸிம் 4’ திட்டத்தின் கீழ் இந்திய வீரர் ஒருவரை சர்வதேச விண்வெளி மையத்துக்கு அனுப்ப இஸ்ரோ முடிவு செய்தது.
இதன் தொடர்ச்சியாக அமெரிக்கா, இந்தியா (விமானப்படை வீரர் சுபான்ஷு ஷுக்லா), போலந்து, ஹங்கேரி ஆகிய நாடுகளைச் சேர்ந்த தலா ஒருவர் என 4 பேர் கொண்ட விண்வெளி வீரர்கள் குழு பல மாதங்களாக பயிற்சி மேற்கொண்டது.
பயிற்சி நிறைவு பெற்றதும், நடப்பு ஜூன் மாத தொடக்கத்தில் விண்வெளி பயணத்தை மேற்கொள்ள இந்த குழு திட்டமிட்டிருந்த நிலையில் தொழில்நுட்ப கோளாறு காரணமாக விண்வெளிப் பயணம் ஒத்திவைக்கப்பட்டது.
இந்நிலையில், அமெரிக்காவின் புளோரிடாவில் உள்ள நாசாவின் கென்னடி விண்வெளி மையத்தில் இருந்து, சுபான்ஷு சுக்லா உள்ளிட்ட 4 விண்வெளி வீரர்கள் இருக்கும் டிராகன் விண்கலத்தை சுமந்துகொண்டிருந்த ஸ்பேஸ் எக்ஸின் ஃபால்கன் 9 ராக்கெட், (இந்திய நேரப்படி) நண்பகல் 12 மணி அளவில் விண்ணில் ஏவப்பட்டது.
விண்ணில் ஏவப்பட்ட ஓரிரு நிமிடங்கள் கழித்து, ஃபால்கன் ராக்கெட்டில் இருந்து வெற்றிகரமாகப் பிரிந்த டிராகன் விண்கலம், சர்வதேச விண்வெளி நிலையத்தை நோக்கி பயணத்தை தொடங்கியது. 14 நாள்கள் சர்வதேச விண்வெளி நிலையத்தில் தங்கியிருந்து இந்த 4 பேர் குழு பல்வேறு ஆராய்ச்சிகளில் ஈடுபடவுள்ளது.
இந்த பயணத்தின் மூலம், ராகேஷ் ஷர்மாவிற்குப் பிறகு விண்வெளிக்குச் செல்லும் 2-வது இந்தியர் என்கிற பெருமையை சுபான்ஷு சுக்லா பெற்றுள்ளார். மேலும், சர்வதேச விண்வெளி நிலையத்திற்கு செல்லும் முதல் இந்தியர் என்கிற பெருமையும் அவர் வசமாகவுள்ளது.
