புதுச்சேரியில் தமிழக வெற்றிக் கழகம் கூட்டணி அமைப்பது குறித்து தகவல்கள் வெளியான நிலையில், கட்சியின் பொதுச்செயலாளர் என். ஆனந்த் விளக்கமளித்துள்ளார்.
புதுச்சேரி முதல்வர் என். ரங்கசாமி மற்றும் தமிழக வெற்றிக் கழகத் தலைவர் விஜய் இடையே நல்லுறவு இருந்து வருகிறது. இருவரும் நேரில் சந்தித்துக் கொள்வார்கள். அலைபேசியில் பேசி வாழ்த்துகளைப் பரிமாறிக் கொள்வார்கள். அண்மையில் தமிழக வெற்றிக் கழகத்தின் பொதுச்செயலாளர் என். ஆனந்த் பிறந்தநாளன்று அவருடைய வீட்டுக்கே சென்று வாழ்த்து கூறினார் புதுச்சேரி முதல்வர் என். ரங்கசாமி.
இதனால், புதுச்சேரியில் தமிழக வெற்றிக் கழகம் மற்றும் என்.ஆர். காங்கிரஸ் இடையே கூட்டணி அமையலாம் எனப் பேச்சுகள் எழுந்து வருகின்றன.
இந்நிலையில் தான் தவெக பொதுச்செயலாளர் என். ஆனந்த் இதுகுறித்து எக்ஸ் தளப் பக்கத்தில் விளக்கமளித்துள்ளார்.
"தமிழக வெற்றிக் கழகத்தின் வெற்றித் தலைவர் அவர்களின் வழிகாட்டுதலின்படி வரும் 2026ஆம் ஆண்டு நடைபெற உள்ள தமிழகச் சட்டமன்றத் தேர்தலில் பெரும்பான்மை பலத்துடன் வெற்றி பெற்று ஆட்சி அமைப்பதற்கான அனைத்து வியூகங்களையும் வகுத்து, தேர்தலைச் சந்திக்கத் தமிழக வெற்றிக் கழகம் தயாராகி வருகிறது.
இச்சூழலில், 2026 சட்டமன்றத் தேர்தலில் ஆட்சி மாற்றத்திற்கான முதன்மைச் சக்தியாக, ஒட்டுமொத்த தமிழக மக்களின் ஏகோபித்த வரவேற்பையும் ஆதரவையும் பெற்று, மக்கள் மத்தியில் தமிழக வெற்றிக் கழகம் அடைந்து வரும் எழுச்சியை மடைமாற்றம் செய்யும் உள்நோக்கத்தோடு, அடிப்படை ஆதாரமற்ற தகவல்களைக் கொண்டு, புதுச்சேரியில் தமிழக வெற்றிக் கழகம் கூட்டணி என்று வார இதழ் ஒன்று உண்மைக்கு முற்றிலும் புறம்பான தகவல்களைச் செய்தியாக வெளியிட்டுள்ளது. இந்தச் செய்தி, முற்றிலும் தவறானது. ஆதாரமோ அடிப்படையோ அற்றது. இது போன்ற வதந்திகளை பரப்பும் ஊடகத்தின் பொய்ச் செய்திகளை மக்கள் புறக்கணித்து விடுவார்கள். கூட்டணி தொடர்பாகத் தமிழக வெற்றிக் கழகம், புதுச்சேரி மாநிலத்தில் யாருடனும் பேச்சுவார்த்தையில் ஈடுபடவில்லை.
தமிழக வெற்றிக் கழகத்தின் புதுச்சேரி மாநிலப் பொறுப்பாளர்களின் விவரங்களைக் கழகத் தலைவர் அவர்கள் விரைவில் அறிவிப்பார். தேர்தல் நிலைப்பாடு குறித்தும் கழகத் தலைவர் அவர்களின் முடிவே இறுதியானது. எனவே, மக்களைக் குழப்பும் நோக்கில் தமிழக வெற்றிக் கழகம் தொடர்பாக யூகத்தின் அடிப்படையில் உண்மைக்குப் புறம்பான கருத்துகளைச் செய்திகளாக வெளியிடுவதை ஊடகங்கள் தவிர்க்க வேண்டும் என்று கழகத் தலைவர் அவர்களின் ஒப்புதலுடன் கேட்டுக்கொள்கிறேன்" என்று என். ஆனந்த் தனது அறிக்கையில் குறிப்பிட்டுள்ளார்.
Tamilaga Vetri Kazhagam | TVK | TVK Vijay | N. Anand | N Anand | Bussy Anand | TVK General Secretary | TVK Alliance | Puducherry | TVK Puducherry | NR Congress | N Rangaswamy |
