காங்கிரஸ் மூத்த தலைவரும் ஈரோடு கிழக்கு சட்டப்பேரவை உறுப்பினருமான ஈவிகேஎஸ் இளங்கோவனுக்கு தமிழக வெற்றிக் கழகத் தலைவர் விஜய் இரங்கல் தெரிவித்துள்ளார்.
தந்தை பெரியாரின் அண்ணன் மகன் ஈவிகே சம்பத்தின் மகனாவார் ஈவிகேஎஸ் இளங்கோவன். 1948-ல் பிறந்த இளங்கோவன், தன் தந்தையின் வழியைப் பின்பற்றி ஆரம்பம் முதலே காங்கிரஸ் கட்சியில் தீவிரமாகப் பணியாற்றிவந்தார்.
தமிழக காங்கிரஸ் கமிட்டி தலைவர், சட்டப்பேரவை உறுப்பினர், நாடாளுமன்ற உறுப்பினர், மத்திய இணையமைச்சர் உள்ளிட்ட பல்வேறு பதவிகளை வகித்துள்ளார் இளங்கோவன்.
ஈவிகேஎஸ் இளங்கோவனின் மகன் திருமகன் ஈவேரா, கடந்த 2021 தமிழக சட்டப்பேரவை தேர்தலில் ஈரோடு கிழக்கு தொகுதியில் போட்டியிட்டு வெற்றிபெற்றார். 2023-ல் மாரடைப்பு காரணமாக திருமகன் ஈவேரா உயிரிழந்ததை அடுத்து, ஈரோடு கிழக்கு தொகுதி இடைத்தேர்தலில் போட்டியிட்டு வெற்றிபெற்றார் இளங்கோவன்.
கடந்த நவம்பர் 27-ல் உடல்நலக்குறைவு காரணமாக சென்னை மணப்பாக்கத்தில் உள்ள மியாட் மருத்துவமனையில் சிகிச்சைக்காக அனுமதிக்கப்பட்டார் இளங்கோவன். இந்நிலையில் இன்று காலை 10.12 மணி அளவில் சிகிச்சை பலனின்றி அவர் உயிரிழந்தார்.
இவருடைய மறைவுக்கு பல்வேறு அரசியல் தலைவர்கள் இரங்கல் தெரிவித்து வருகிறார்கள். தவெக தலைவர் விஜயும் எக்ஸ் தளப் பக்கத்தில் இரங்கலைத் தெரிவித்துள்ளார்.
"மிகப்பெரிய அரசியல் பாரம்பரியத்தைக் கொண்டவரும், தந்தை பெரியாரின் குடும்பத்தைச் சேர்ந்தவரும், தமிழ்நாடு காங்கிரஸ் கமிட்டியின் முன்னாள் தலைவரும், காங்கிரஸ் கட்சியின் மூத்தத் தலைவரும், முன்னாள் ஒன்றிய ஜவுளித் துறை இணை அமைச்சரும், தற்போதைய ஈரோடு கிழக்கு சட்டமன்ற உறுப்பினருமான ஈ.வி.கே.எஸ். இளங்கோவன் அவர்கள் உடல்நலக்குறைவால் காலமான செய்தியறிந்து மிகுந்த மன வேதனை அடைந்தேன்.
அவரைப் பிரிந்து வாடும் குடும்பத்தினர் மற்றும் காங்கிரஸ் கட்சியினருக்கு எனது ஆழ்ந்த அனுதாபங்களைத் தெரிவித்துக் கொள்கிறேன். ஈ.வி.கே.எஸ். இளங்கோவன் அவர்களின் ஆன்மா சாந்தியடைய இறைவனைப் பிரார்த்திக்கின்றேன்" என்று விஜய் குறிப்பிட்டுள்ளார்.
