தமிழ்நாட்டில் இன்று (அக்டோபர் 22) திருவள்ளூர் மற்றும் ராணிப்பேட்டை மாவட்டங்களுக்கு அதி கனமழைக்கான சிவப்பு நிற எச்சரிக்கை விடுக்கப்பட்டுள்ளது.
தமிழ்நாட்டில் வடகிழக்குப் பருவமழை நாளுக்கு நாள் தீவிரமடைந்து வருகிறது. வங்கக் கடலில் உருவாகியுள்ள காற்றழுத்தத் தாழ்வுப் பகுதி புயலாக வலுப்பெறுமா என்பதை இன்று தான் சரியாகச் சொல்ல முடியும் என வானிலை ஆய்வு மையத்தின் தென் மண்டலத் தலைவர் அமுதா நேற்று அறிவித்திருந்தார்.
காற்றழுத்தத் தாழ்வுப் பகுதி வட தமிழகக் கடலோரப் பகுதிகளை ஒட்டி வருவதால் நேற்றிரவு முதல் இன்று காலை வரை மழையின் தீவிரம் அதிகமாக இருக்கும் எனக் கணிக்கப்பட்டிருந்தது. இதன் காரணமாக பல்வேறு மாவட்டங்களில் பள்ளி, கல்லூரிகளுக்கும் சில மாவட்டங்களில் பள்ளிகளுக்கு மட்டும் விடுமுறை அறிவிக்கப்பட்டன.
இந்நிலையில், திருவள்ளூர் மற்றும் ராணிப்பேட்டையில் இன்று அதி கனமழைக்கான வாய்ப்பு இருப்பதாக வானிலை ஆய்வு மையம் சிவப்பு நிற எச்சரிக்கையை விடுத்துள்ளது. இதுதவிர சென்னை, காஞ்சிபுரம், செங்கல்பட்டு, திருவண்ணாமலை, வேலூர், திருப்பத்தூர், கிருஷ்ணகிரி, தருமபுரி, சேலம் ஆகிய மாவட்டங்களில் மிகக் கனமழைக்கான ஆரஞ்சு நிற எச்சரிக்கை விடுக்கப்பட்டுள்ளது.
கோவை, நீலகிரி, ஈரோடு, தேனி, தென்காசி, திருநெல்வேலி, கன்னியாகுமரி, திருச்சி, பெரம்பலூர், கள்ளக்குறிச்சி, கடலூர், விழுப்புரம் மற்றும் புதுச்சேரியில் கனமழைக்கான மஞ்சள் நிற எச்சரிக்கை விடுக்கப்பட்டுள்ளது. காவிரி படுகை உள்ளிட்ட மற்ற மாவட்டங்களுக்கு எவ்வித மழை எச்சரிக்கையும் விடுக்கப்படவில்லை.
அக்டோபர் 22 காலை நிலவரப்படி புதுச்சேரியில் பெரியகாலாப்பட்டு ஏஆர்ஜியில் 248 மி.மீ. அளவுக்கு மழை பதிவாகியுள்ளது. புதுச்சேரி நகரில் 207 மி.மீ. அளவுக்கு மழை பதிவாகியுள்ளது. தமிழ்நாட்டில் அதிகபட்சமாக விழுப்புரம் மாவட்டம் வானூரில் 184 மி.மீ. அளவுக்கு மழை பதிவாகியுள்ளது. இதற்கு அடுத்தபடியாக கடலூரில் 179.8 மி.மீ., கடலூர் மாவட்ட ஆட்சியர் அலுவலகத்தில் 176.8 மி.மீ. அளவுக்கு மழை பதிவாகியுள்ளது. சென்னையைப் பொறுத்தவரை மண்டலம் 11 மதுரவாயலில் 106.5 மி.மீ. அளவுக்கு மழை பெய்துள்ளது.
Rain Alert | Red Alert | Rain Alert | Chennai Rain | Chennai Rains | Weather Report | Weather Alert | IMD Chennai | RMC Chennai | Bay of Bengal | Low Pressure | Low Pressure Area | Arabian Sea | Andaman Sea |
