சென்னை ஈசிஆர் சாலையில் உள்ள தனியார் பொழுதுபோக்கு பூங்காவில் ராட்சத ராட்டினத்தில் சிக்கியவர்களை 3 மணி நேரத்துக்குப் பிறகு தீயணைப்புத் துறையினர் மீட்டார்கள்.
சென்னை ஈசிஆர் சாலையில் தனியார் பொழுதுபோக்கு பூங்கா அமைந்துள்ளது. இங்கு தண்ணீர் சார்ந்த விளையாட்டுகள், ராட்சத ராட்டினங்கள் என குழந்தைகள் முதல் பெரியவர் வரை அனைவருக்குமான பொழுதுபோக்கு பூங்காவாகச் செயல்பட்டு வருகிறது. கோடை விடுமுறை என்பதால், இங்கு மக்கள் அதிகளவில் சென்று வருவதாகத் தெரிகிறது.
செவ்வாய்க்கிழமை மாலை இந்தப் பூங்காவில் ராட்சத ராட்டினம் வழக்கம்போல் செயல்பட்டுள்ளது. மக்களும் இதை அனுபவிக்க முயன்று ராட்டினத்தில் ஏறியிருக்கிறார்கள்.
ராட்சத ராட்டினம் இயங்கியபோது, ராட்டினத்தின் மோட்டாரிலிருந்து சப்தம் வந்ததாகத் தெரிகிறது. ஊடகங்களில் இவ்வாறு செய்தி வெளியாகியிருக்கிறது. இதைத் தொடர்ந்து முன்னெச்சரிக்கை நடவடிக்கையாக ராட்சத ராட்டினம் உடனடியாக நிறுத்தப்பட்டதாகத் தெரிகிறது. ராட்சத ராட்டினம் பெரும் உயரத்திலிருந்தபோது நின்றிருக்கிறது.
இதனால், ராட்டினத்தில் இருந்த 30 பேரை மீட்பது சவாலாக இருந்துள்ளது. பொழுதுபோக்கு பூங்காவைச் சேர்ந்தவர்கள் கிரேன் உள்ளிட்ட வாய்ப்புகளைப் பயன்படுத்தியுள்ளார்கள். இருந்தபோதிலும், ராட்சத ராட்டினம் இருந்த உயரத்தை இவர்களால் அடையமுடியவில்லை எனத் தெரிகிறது.
இதைத் தொடர்ந்து, தீயணைப்புத் துறையினர் இதுதொடர்பாகத் தகவல் தெரிவிக்கப்பட்டது. ராட்சத ராட்டினத்தில் இருந்தவர்கள் சுமார் 3 மணி நேரம் அந்தரத்தில் சிக்கித் தவித்துள்ளார்கள். இவர்களில் குழந்தைகள் மற்றும் பெண்களும் இருந்திருக்கிறார்கள். தீயணைப்புத் துறையினர் ராட்சத கிரேன் மூலம் ராட்டினத்தில் சிக்கியிருந்தவர்களை வெற்றிகரமாக மீட்டுள்ளார்கள். முதலில் குழந்தைகள் மற்றும் பெண்களை மீட்டுள்ளார்கள். படிப்படியாக ராட்டினத்தில் சிக்கியிருந்த அனைவரும் மீட்கப்பட்டிருக்கிறார்கள். நீண்ட நேரம் அந்தரத்தில் அச்சத்துடன் சிக்கியிருந்தது சற்று பதற்றத்தைத் தந்தது. ஆனால், எவ்வித அசம்பாவிதமும் நிகழாமல் அனைவரும் மீட்கப்பட்ட செய்தி அனைவரிடத்திலும் பெரு நிம்மதியை உண்டாக்கியுள்ளது.
