தூய்மைப் பணியாளர்களுக்கு மூன்று வேளையும் உணவு வழங்கப்படும் திட்டம் டிசம்பர் 6 முதல் அனைத்து மாநகராட்சி மற்றும் நகராட்சிகளுக்கும் விரிவாக்கப்படும் என்று முதலமைச்சர் மு.க. ஸ்டாலின் அறிவித்தார்.
கடந்த ஆகஸ்ட் மாதம் முதலமைச்சர் மு.க. ஸ்டாலின் தலைமையில் நடைபெற்ற அமைச்சரவைக் கூட்டத்தில் தூய்மைப் பணியாளர்கள் நலனுக்காக 6 சிறப்புத் திட்டங்களை செயல்படுத்த ஒப்புதல் அளிக்கப்பட்டது. குறிப்பாக, நகர்புற உள்ளாட்சி அமைப்புகளில் பணியில் ஈடுபடும் தூய்மைப் பணியாளர்களுக்கு காலை உணவு அந்தந்த உள்ளாட்சி அமைப்புக்களால் கட்டணமின்றி வழங்கப்படும். இத்திட்டம் முதற்கட்டமாக பெருநகர சென்னை மாநகராட்சியில் செயல்படுத்தப்பட்டு, படிப்படியாக மற்ற நகர்ப்புற உள்ளாட்சி அமைப்புகளுக்கும் விரிவுபடுத்தப்படும் என்பது உள்ளிட்ட திட்டங்கள் அறிவிக்கப்பட்டன.
அதன்படி தூய்மைப் பணியாளர்களுக்கு உணவு வழங்கும் திட்டத்தை இன்று முதலமைச்சர் மு.க. ஸ்டாலின் தொடங்கி வைத்தார். சென்னை கலைவாணர் அரங்கத்தில் நடந்த நிகழ்ச்சியில் பங்கேற்ற அவர் பேசியதாவது:-
“ஆரோக்கியமான வாழ்க்கைக்கு அடிப்படை தூய்மைதான். வெயில், மழை, வெள்ளம், புயல் என்று இந்த மாநகரம் எந்தப் பேரிடரை எதிர்கொண்டாலும் அதிலிருந்து மீண்டு வருகிறது என்றால் அது தூய்மைப் பணியாளர்களால்தான். தூய்மைப் பணியாளர்களின் ஒப்பற்ற உழைப்பால்தான் நமது சுற்றுப்புறம் சுத்தமாக இருக்கிறது. நீர்நிலைகள் தூய்மையாக இருக்கிறது. குழந்தைகள் நலமாக பள்ளிகளுக்குச் சென்று வருகிறார்கள்.
தூய்மைப் பணியாளர்களின் நலன்கள் பாதுகாக்கப்படும். மாண்பு காக்கப்பட வேண்டும். வாழ்க்கைத் தரம் உயர வேண்டும். இதுதான் சமூக நீதி. இதனைக் காத்துப் பசியைப் போக்கத்தான் இன்று முதலமைச்சரின் உணவுத் திட்டம் தொடங்கி வைக்கப்படுகிறது. தூய்மைப் பணியாளர்களுக்கு அவர்களது பணிகளுக்கு இடையில் உணவு வேளையில் சுவையும் ஆரோக்கியமும் நிறைந்த உணவு வழங்கப்படும். தூய்மையான முறையில் சமைக்கப்பட்டு , சூடு குறையாமல் இருக்க வெப்பக்காப்பு பையில் அதைக் கொண்டு சென்று தூய்மைப் பணியாளர்கள் பணியாற்றும் இடத்திற்கு அருகிலேயே உள்ளாட்சி அமைப்புக்குச் சொந்தமான கட்டடத்தில் உணவு பரிமாறப்படும். நம் நலனுக்காக உழைக்கும் மக்களுக்கு உணவு அளிக்க வேண்டியது அரசின் பொறுப்பு.
தமிழ்நாட்டில் திமுக ஆட்சிக் காலத்தில் தூய்மைப் பணியாளர்கள் நலனுக்காக பல முக்கிய திட்டங்களைச் செய்திருக்கிறோம். சுருக்கமாகச் சொல்வதென்றால், 2006 - 2011-ல் கருணாநிதியின் ஆட்சிக் காலத்தில்தான் தூய்மைப் பணியாளர்கள் நலவாரியம் அமைக்கப்பட்டது. கல்வி உதவித் தொகை, திருமண நிதியுதவி வழங்கும் திட்டம் தொடங்கப்பட்டது. தாட்கோ நிறுவனம் மூலம் தூய்மைப் பணியாளர்களுக்கும் அவர்களது வாரிசுகளுக்கும் தொழில் சார்ந்த பயிற்சிகள் வழங்கப்படும் திட்டம், சுகாதாரா காப்பீட்டு பாதுகாப்பு உபகரணங்கள் வழங்கும் திட்டம், மூன்று சக்கர மிதிவண்டி, இலகுரக வாகனங்கள் வழங்கும் திட்டம், பாதாள சாக்கடை அடைப்பு நீக்கும் பணியில் ஈடுபட்டு உயிரிழக்க நேர்ந்தால், அவர்களது வாரிசுகளுக்கு ரூ. 30 லட்சம் கருணைத் தொகை வழங்கும் திட்டம் உள்ளிட்ட பல்வேறு திட்டங்கள் கொண்டு வரப்பட்டுள்ளன. தற்போது சென்னை மெட்ரோ வாட்டர் மற்றும் கழிவுநீர் அகற்றுவரியம் சார்பில் பாதாளச் சாக்கடை திட்டத்தின் மூலம் நடைபெறும் அனைத்துப் பணிகளும் முழுமையாக இயந்திரமயம் ஆக்கப்பட்டிருக்கிறது.
இன்று தொடங்கப்பட்டிருக்கும் முதலமைச்சரின் உணவுத் திட்டம் டிசம்பர் 6 முதல் அனைத்து மாநகராட்சிகள் மற்றும் நகராட்சிகளுக்கும் விரிவுப்படுத்தப்படும். நான் ஏற்கெனவே சொன்னதுபோல் தூய்மைப் பணியாளர்களின் கோரிக்கைகள் படிப்படியாக நிச்சயம் நிறைவேற்றித் தரப்படும். சென்னைதான் தூய்மையான நகரம், தமிழ்நாடுதான் தூய்மையான மாநிலம் என்று சொல்லப்பட வேண்டும். அதற்குத் தூய்மைப் பணியாளர்கள் அனைவரும் துணை நிற்க வேண்டும்” என்றார்.
Chief Minister M.K. Stalin announced that the scheme to provide three meals a day to sanitation workers will be expanded to all municipal corporations and municipalities starting from December 6.
