வேலூர் மாவட்டத்தில் ஓடும் ரயிலில் கர்ப்பிணிப் பெண்ணுக்குப் பாலியல் தொல்லை அளித்த கீழே தள்ளிய வழக்கில், குற்றவாளி ஹேமராஜுக்கு சாகும் வரை சிறை தண்டனை அளித்து திருப்பத்தூர் நீதிமன்றம் தீர்ப்பளித்துள்ளது.
ஆந்திர மாநிலத்தின் சித்தூரைச் சேர்ந்த கர்ப்பிணிப் பெண் ஒருவர், திருப்பூரில் உள்ள தனியார் பனியன் கம்பெனியில் பணியாற்றி வந்துள்ளார். சித்தூருக்குச் செல்வதற்காக கடந்த பிப்ரவரி 6 அன்று கோவை-திருப்பதி இண்டர்சிட்டி விரைவு ரயிலில் உள்ள பெண்கள் பெட்டியில் அவர் பயணித்துள்ளார்.
இந்நிலையில், சம்மந்தப்பட்ட பெட்டியின் கழிவறையை உபயோகிக்க அந்த கர்ப்பிணிப் பெண் முயன்றபோது, அங்கிருந்த ஒரு மர்ம நபர் அப்பெண்ணை பாலியல் வன்கொடுமை செய்ய முயற்சித்துள்ளார். மர்ம நபரை எதிர்த்து கடுமையாகப் போராடியதில், அந்த கர்ப்பிணிப் பெண்ணுக்குக் கை முறிந்துள்ளது.
இதற்கிடையே கே.வி. குப்பம் அருகே ரயில் சென்றுகொண்டிருந்தபோது, கூச்சலிட்டுப் பிறரை உதவிக்கு அழைக்க கர்ப்பிணிப் பெண் முயன்றுள்ளார். இதனால் ஆத்திரமடைந்த அந்த மர்ம நபர் அப்பெண்ணை ரயிலில் இருந்து கீழே தள்ளியுள்ளார். ரயிலில் இருந்து கீழே விழுந்ததும், அந்தப் பெண் மயக்கமடைந்துள்ளார்.
இந்த தகவல் கிடைத்ததும், ஜோலார்பேட்டை ரயில்வே காவல்துறையினர் அப்பெண்ணை மீட்டு வேலூர் அரசு மருத்துவக் கல்லூரி மருத்துவமனையில் சிகிச்சைக்காக அனுமதித்துள்ளார்கள். ரயிலில் இருந்து கீழே விழுந்ததில் அந்த பெண்ணுக்குக் காலில் முறிவும், தலையில் பலத்த காயமும் ஏற்பட்டுள்ளது.
சிகிச்சைக்குப் பிறகு அப்பெண்ணுக்கு சுயநினைவு திரும்பியதும், ரயில்களில் குற்றச்செயல்களில் ஈடுபடும் குற்றவாளிகள் பதிவேட்டில் உள்ள புகைப்படங்கள் அவரிடம் காட்டப்பட்டன. அதில் இருந்த ஹேமராஜ் என்பவரை அவர் அடையாளம் காண்பித்துள்ளார்.
2022-ல் பெண் ஒருவரின் கைப்பேசியை பறித்து அவரை ரயிலில் இருந்து கீழே தள்ளிவிட்ட வழக்கும், 2024-ல் குடியாத்தம் மலைப்பகுதியில் பெண் ஒருவரைக் கொலை செய்த வழக்கும் ஹேமராஜ் மீது நிலுவையில் உள்ளதாக கூறப்பட்டது.
இதைத் தொடர்ந்து ஹேமராஜை ரயில்வே காவல்துறையினர் கைது செய்தனர். அவர் மீது 8 பிரிவுகளின் கீழ் வழக்குப்பதிவு செய்யப்பட்டு வேலூர் சிறையில் அடைக்கப்பட்டார். இந்த வழக்கு மீதான விசாரணை திருப்பத்தூர் நீதிமன்றத்தில் நடைபெற்று நிலையில், கடந்த ஜூலை 11 அன்று ஹேமராஜ் குற்றவாளி என்று அறிவிக்கப்பட்டார்.
இந்நிலையில், ஹேமராஜுக்கான தண்டனை விவரங்களை நீதிபதி மீனாகுமாரி இன்று (ஜூலை 14) வெளியிட்டுள்ளார். இதன்படி அவருக்கு சாகும் வரை சிறை தண்டனை அளிக்கப்பட்டுள்ளது.
அத்துடன் பாதிக்கப்பட்ட கர்ப்பிணிப் பெண்ணுக்கு ரயில்வே துறை சார்பில் ரூ. 50 லட்சமும், தமிழக அரசு சார்பில் ரூ. 50 லட்சமும் நிவாரணமாக வழங்க நீதிபதி உத்தரவிட்டுள்ளார்.
