ரஜினியை மாதத்திற்கு ஒருமுறை சந்திப்பது வழக்கம். அதை அரசியலில் இழுத்து விட வேண்டாம் என அண்ணாமலை தெரிவித்தார்.
தமிழக அரசியல் களத்தில் பாஜகவின் முன்னாள் தலைவர் அண்ணாமலை தனி அலையை உருவாக்கி வருகிறார். அண்மையில் அவர் ரஜினியைச் சந்தித்த படங்கள் இணையத்தில் வெளியாகின. அதுகுறித்த கேள்விக்கு அண்ணாமலை விளக்கம் அளித்தார்.
சென்னையில் நேற்று (செப்.22) செய்தியாளர்களை அண்ணாமலை சந்தித்தார். அப்போது அவர் பேசியதாவது :-
”நான் ரஜினியை அடிக்கடி பார்ப்பேன். மாதத்திற்கு ஒரு முறை, இரண்டு மாதத்திற்கு ஒரு முறை சந்திப்பேன். அதை சமூக வலைதளத்தில் வெளியிடுவதில்லை. ரஜினி எனக்குத் தலைவர். ஒரு சினிமா நடிகராகப் பார்க்கவில்லை. அவர் எனக்கு ஆத்மார்த்தமான நட்பு, ஆன்மீக அடிப்படையில் முதலில் இருந்து பழக்கமுள்ளவர். அவரைச் சமீபத்தில் சந்தித்தேன். அவர் ஆன்மீகம் பற்றி பல விஷயங்கள் சொல்வார், யோகா போகச் சொல்வார். அவரை ஒரு குருவாகப் பார்க்கிறேன். அவரை அரசியல் களத்திற்கு இழுத்து விட வேண்டாம்”
என்று கூறினார்.
பாஜக தலைவராக நயினார் நாகேந்திரன் மாற்றப்பட்டதில் இருந்து அண்ணாமலை பாஜக சார்ந்த நிகழ்ச்சிகளுக்குப் பெரும்பாலும் கலந்து கொள்வதைத் தவிர்த்து வருகிறார். மறுபுறம், அரசியல் களத்தில் உள்ள முக்கிய தலைவர்களுடனான அவரது சந்திப்பு அரசியலில் பேசுபொருளாகி வருகிறது. அண்மையில் அவர் அமமுக பொதுச்செயலாளர் டிடிவி தினகரைச் சந்தித்தது குறிப்பிடத்தக்கது.
