நேற்று (ஜூலை 27) மக்களவையில் மத்திய பட்ஜெட்டைத் தாக்கல் செய்தார் மத்திய நிதியமைச்சர் நிர்மலா சீதாராமன். மத்திய பட்ஜெட் உரையை வாசித்து முடித்ததைத் தொடர்ந்து, ஜம்மு காஷ்மீர் யூனியன் பிரதேச பட்ஜெட்டையும் அவர் மக்களவையில் தாக்கல் செய்தார்.
நாடாளுமன்றத்தால் 2019-ல் இந்திய அரசியலமைப்புச் சட்டப் பிரிவு 370 ரத்து செய்யப்பட்டது. இதன் மூலம் அன்றைய ஜம்மு – காஷ்மீர் மாநிலத்துக்கு இருந்த சிறப்பு அந்தஸ்து முடிவுக்கு வந்தது. இதைத் தொடர்ந்து ஜம்மு – காஷ்மீர் மாநில மறுசீரமைப்பு சட்டம் நாடாளுமன்றத்தால் நிறைவேற்றப்பட்டது. இதனால் ஜம்மு – காஷ்மீர் மாநிலத்தில் இருந்து, லடாக் யூனியன் பிரதேசமும், ஜம்மு - காஷ்மீர் யூனியன் பிரதேசமும் புதிதாக உருவாகின.
ஆனால் ஜம்மு - காஷ்மீர் யூனியன் பிரதேச சட்டப்பேரவைக்குத் தேர்தல் நடைபெறாததால், அம்மாநில பட்ஜெட்டை 2020-ல் இருந்து நாடாளுமன்றத்தில் தாக்கல் செய்து மத்திய அரசு. நேற்று ஐந்தாவது முறையாக ஜம்மு - காஷ்மீர் பட்ஜெட்டைத் தாக்கல் செய்கிறார் நிர்மலா சீதாராமன்.
ஜம்மு - காஷ்மீர் பட்ஜெட் மூலம் அம்மாநிலத்துக்கு ரூ. 1,18,390 கோடி ஒதுக்கீடு செய்யப்பட்டது. மேலும் மத்திய பட்ஜெட் மூலம் ஜம்மு – காஷ்மீருக்கு ரூ. 42,278 கோடியும், ஜம்மு காஷ்மீர் காவல்துறைக்கு ரூ. 9,789 கோடியும் ஒதுக்கப்பட்டது. கடந்த ஆண்டை ஒப்பிடும்போது இது 1.2 % அதிகமாகும்.
ஜம்மு – காஷ்மீர் பட்ஜெட் தொடர்பாக இன்று நாடாளுமன்றத்தில் விவாதம் மேற்கொள்ளப்பட்டது. இந்த விவாதத்தில் கலந்து கொண்டு பேசிய தேசியவாத காங்கிரஸ் எம்.பி. சுப்ரியா சுலே, `ஜம்மு - காஷ்மீரை பிரிக்கும் போது ஓராண்டில் அங்கு தேர்தல் நடத்தப்படும் என்று உள்துறை அமைச்சர் அமித்ஷா அப்போது அறிவித்தார். ஆனால், தற்போது ஜம்மு - காஷ்மீர் பட்ஜெட் மக்களவையில் தாக்கல் செய்யப்படுவது வேதனை அளிக்கிறது.
ஜம்மு - காஷ்மீர் பட்ஜெட், அந்த யூனியன் பிரதேச சட்டப்பேரவையில் தாக்கல் செய்யப்பட வேண்டும். ஜம்மு - காஷ்மீரில் நாடாளுமன்ற தேர்தலை நடத்தும் போது, சட்டப்பேரவை தேர்தலை நடத்துவதில் என்ன பிரச்னை?’ என்றார்.
கடைசியாக 2014-ல் ஜம்மு - காஷ்மீர் மாநில சட்டப்பேரவைக்குத் தேர்தல் நடந்தது. அதைத் தொடர்ந்து இந்த வருடம் ஜம்மு - காஷ்மீர் சட்டப்பேரவைக்குத் தேர்தல் நடைபெறும் வாய்ப்பு உள்ளது.
