கர்நாடக முதல்வர் சித்தராமையா மற்றும் துணை முதல்வர் டிகே சிவக்குமார் ஆகியோர் இன்று காலை சந்தித்துக் கொண்டு ஒன்றாக உணவருந்தினார்கள்.
கர்நாடகத்தில் காங்கிரஸ் ஆட்சி அமைந்து இரண்டரை ஆண்டுகள் நிறைவடைந்துவிட்டன. கர்நாடக காங்கிரஸ் ஆட்சியில் முதல் இரண்டரை ஆண்டுகளுக்கு சித்தராமையா முதல்வர் பதவியில் தொடர்வார் என்று தொடக்கத்திலேயே முடிவு செய்யப்பட்டது. அடுத்த இரண்டரை ஆண்டுகள் துணை முதல்வராக உள்ள டிகே சிவகுமார் முதல்வர் பதவியில் தொடர்வார் என்று முடிவு செய்யப்பட்டிருந்தது.
இரண்டரை ஆண்டுகள் நிறைவடைந்ததைத் தொடர்ந்து, முதல்வர் பதவியை மாற்றக்கோரி காங்கிரஸ் கட்சிக்குள் குரல்கள் எழத் தொடங்கிவிட்டன. இக்கருத்தை மேலிடத்தில் வலியுறுத்தும் வகையில் சிவகுமார் ஆதரவு எம்எல்ஏ-க்கள் தில்லியில் முகாமிட்டு வருவதாகவும் தகவல்கள் வெளியாகி வருகின்றன.
இப்பிரச்னையைத் தாங்கள் முடிவுக்குக் கொண்டு வருவோம் காங்கிரஸ் மேலிடம் நம்பிக்கை தெரிவித்தது. இதன்படி, சித்தராமையா மற்றும் டிகே சிவகுமாரை நேரில் சந்தித்து பிரச்னையை முடிவுக்குக் கொண்டு வருமாறு கேட்டுக்கொண்டதாகத் தெரிகிறது.
முதல்வர் சித்தராமையா இல்லத்தில் இருவரும் இன்று காலை சந்திப்பு நடைபெற்றது. சித்தராமையா மற்றும் டிகே சிவகுமார் ஆகியோர் இணைந்து ஒன்றாக உணவருந்தினார்கள். முதல்வரின் சட்ட ஆலோசகரும் சட்டப்பேரவை உறுப்பினருமான ஏஎஸ் பொன்னன்னா உடனிருந்தார். இதைத் தொடர்ந்து இருவரும் கூட்டாகச் செய்தியாளர்களைச் சந்தித்தார்கள்.
சித்தராமையா கூறியதாவது:
"நாங்கள் ஒற்றுமையுடன் இருக்கிறோம். எனக்கும் டிகே சிவக்குமாருக்கும் இடையே எந்தக் கருத்து வேறுபாடும் கிடையாது. கட்சி மேலிடம் சொல்வதைக் கேட்க இருவருமே முடிவு செய்துள்ளோம். நாளை முதல் எந்தச் சர்ச்சையும் இருக்காது. இன்றுகூட எந்தச் சர்ச்சையும் கிடையாது. ஆனால், ஊடகங்களில் சிலர் குழப்பத்தை உண்டாக்குகிறார்கள்.
சட்டப்பேரவைக் கூட்டத்தொடரில் எதிர்க்கட்சிகள் பாஜக மற்றும் மதச்சார்பற்ற ஜனதா தளம் வைக்கும் பொய்க் குற்றச்சாட்டுகளை எதிர்கொள்ள வியூகங்களை வகுத்துள்ளோம்.
2023 சட்டப்பேரவைத் தேர்தலில் நாங்கள் இணைந்து பணியாற்றியதைப்போலவே 2028 சட்டப்பேரவைத் தேர்தலிலும் இணைந்து செயல்படுவோம். காங்கிரஸ் ஆட்சிக்கு வருவதை உறுதி செய்வோம்" என்றார் சித்தராமையா.
டிகே சிவகுமார் கூறியதாவது:
"கடந்த காலங்களிலும் நாங்கள் இருவரும் இணைந்து பணியாற்றியுள்ளோம். எதிர்காலத்திலும் ஒற்றுமையாகப் பணியாற்றுவோம். கட்சி மேலிடம் சொல்வதற்குக் கட்டுப்பட்டு நடப்போம். காங்கிரஸில் கோஷ்டியே கிடையாது. காங்கிரஸ் என்பதே ஒரு குழுவாகச் செயல்பட்டு வருகிறது.
இன்று நான் மகிழ்ச்சியாக இருக்கிறேன். முதல்வரும் நானும் காலை உணவை அருந்தினோம். காங்கிரஸைப் பலப்படுத்த வேண்டும், 2028-ல் ஆட்சியைத் தக்கவைக்க வேண்டும் என்பது தான் எங்களுடைய நோக்கம். இந்தியாவில் எங்களுடைய கட்சி கடினமான கட்டத்தில் இருக்கிறது என்பது தெரியும். இருந்தாலும், கர்நாடகம் முக்கியப் பங்காற்றும் என நாங்கள் உறுதியாக நம்புகிறோம். 2028-ல் மீண்டும் வெற்றி பெறுவோம்" என்றார் டிகே சிவகுமார்.
After an hour long breakfast of Idli-Sambar and Upma on Saturday morning, Karnataka Chief Minister Siddaramaiah and his Deputy DK Shivakumar reaffirmed cohesion and unity within the Congress party saying that both the leaders have decided to follow whatever will be the decision of the party high command and resolve any "confusion".
Siddaramaiah | DK Shivakumar | Karnataka | Karnataka Congress |
