வாக்குத் திருட்டுதான் மிகப்பெரிய தேச விரோதச் செயல் என்று விமர்சித்த எதிர்க்கட்சித் தலைவர் ராகுல் காந்தி, இந்தியாவின் ஜனநாயகத்தை சேதப்படுத்த பாஜக தேர்தல் ஆணையத்தை வழிநடத்தி பயன்படுத்துகிறது என்றும் குற்றம்சாட்டினார்.
நாடாளுமன்ற மக்களவையில் வாக்காளர் பட்டியல் சிறப்பு தீவிரத் திருத்தம் தொடர்பான விவாதத்தில் எதிர்க்கட்சித் தலைவர் ராகுல் காந்தி உரையாற்றினார். அப்போது அவர் பேசியதாவது:-
”ஜனவரி 30, 1948 அன்று, மகாத்மா காந்தியின் மார்பில் மூன்று தோட்டாக்கள் துளைத்தன. நாதுராம் கோட்சே நமது தேசப்பிதாவை படுகொலை செய்தார். காந்திஜியின் படுகொலைக்குப் பிறகு, ஆர்எஸ்எஸின் அடுத்த திட்டம் இந்தியாவின் நிறுவன கட்டமைப்பை ஒட்டுமொத்தமாகக் கைப்பற்றுவதாகும்.
அவர்கள் செய்யும் மிகப்பெரிய தேச விரோத செயல் வாக்குத் திருட்டுதான். வாக்குத் திருட்டை விட பெரிய தேச விரோதச் செயல் எதுவும் இல்லை, ஏனென்றால் நீங்கள் வாக்குத் திருட்டைச் செய்யும்போது, இந்த நாட்டின் கட்டமைப்பை அழிக்கிறீர்கள். நீங்கள் நவீன இந்தியாவை அழிக்கிறீர்கள், இந்தியாவின் கருத்தை அழிக்கிறீர்கள். இந்திய ஒன்றியத்தில் உள்ள ஒவ்வொருவரும் சமம் என்ற கருத்துதான் ஆர்எஸ்எஸ்ஸில் உள்ள எனது நண்பர்களைத் தொந்தரவு செய்கிறது. நம் நாட்டின் கட்டமைப்பில் உள்ள ஒவ்வொரு நபரும், அவர்கள் எந்த மதத்தைச் சேர்ந்தவர்களாக இருந்தாலும், அவர்கள் எந்த சமூகத்தைச் சேர்ந்தவர்களாக இருந்தாலும், அவர்கள் எந்த மொழியைப் பேசினாலும், சமமாக இருக்க வேண்டும் என்ற கருத்தை அவர்களால் பொறுத்துக்கொள்ள முடியாது, ஏனெனில் அவர்கள் அடிப்படையில் சமத்துவத்தில் நம்பிக்கை கொண்டிருக்கவில்லை. அவர்கள் ஒரு படிநிலையை நம்புகிறார்கள், மேலும் அந்தப் படிநிலைக்கு மேல் இருக்க வேண்டும் என்று அவர்கள் விரும்புகிறார்கள்.
இந்திய வரலாற்றில் எந்த பிரதமரும் இதைச் செய்யவில்லை. டிசம்பர் 2023 இல், இந்த அரசாங்கம் சட்டத்தை மாற்றியது. தேர்தல் ஆணையராக இருக்கும்போது எந்த தேர்தல் ஆணையரும் எடுக்கும் எந்தவொரு செயலுக்கும் தண்டிக்கப்படக்கூடாது என்பதை உறுதி செய்வதற்காக அவர்கள் சட்டத்தை மாற்றினர். பிரதமரும் உள்துறை அமைச்சரும் தேர்தல் ஆணையருக்கு இந்த விலக்கு அளிக்கும் பரிசை ஏன் வழங்க வேண்டும்?
சிசிடிவி கேமராக்கள் மற்றும் அவற்றில் உள்ள தரவுகள் தொடர்பான சட்டம் ஏன் மாற்றப்பட்டது? தேர்தல் முடிந்த 45 நாட்களுக்குப் பிறகு சிசிடிவி காட்சிகளை அழிக்க தேர்தல் ஆணையத்தை அனுமதிக்கும் சட்டம் ஏன் இயற்றப்பட்டது? அதற்கான தேவை என்ன? கொடுக்கப்பட்ட பதில் என்னவென்றால், தரவுகளைப் பாதுகாக்க இது செய்யப்பட்டதாக சொன்னார்கள். இது தரவு பற்றிய கேள்வி அல்ல. இது தேர்தலைத் திருடும் கேள்வி. இந்த நிறுவனக் கைப்பற்றலின் விளைவு என்ன? தலைமைத் தேர்தல் ஆணையரையும் தேர்தல் ஆணையத்தையும் கட்டுப்படுத்துவதன் விளைவு என்ன? முதலாவதாக, பிரதமருக்காக வடிவமைக்கப்பட்ட தேர்தல் பிரசாரங்களின் தொகுப்பு எங்களிடம் உள்ளது. பிரதமரின் அட்டவணையை திட்டத்தில் பொருத்தக்கூடிய வகையில் 3-5 மாத கால பிரச்சாரங்கள் நடைபெற்று வருகின்றன. இரண்டாவதாக, ஹரியானா வாக்காளர் பட்டியலில் 22 முறை இடம்பெறும் ஒரு பிரேசிலியப் பெண்மணி இருக்கிறார்.
இந்தியாவின் ஜனநாயகத்தை சேதப்படுத்த பாஜக தேர்தல் ஆணையத்தை வழிநடத்தி பயன்படுத்துகிறது என்பதை மிகத் தெளிவுபடுத்தும் கேள்விகளை நான் கேட்க விரும்புகிறேன். முதல் கேள்வி, தலைமை நீதிபதி ஏன் தேர்தல் ஆணையரின் தேர்வுக் குழுவிலிருந்து நீக்கப்பட்டார்? அவர் ஏன் அந்த அறையில் இல்லை? தேர்தல் ஆணையராக யார் இருக்கப் போகிறார் என்பதைத் தேர்ந்தெடுப்பதில் பிரதமரும் அமித் ஷாவும் ஏன் இவ்வளவு ஆர்வமாக உள்ளார்கள்?” என்று கேள்வி எழுப்பினார்.
Opposition leader Rahul Gandhi criticized vote rigging as the biggest anti-national act and accused the BJP of using the Election Commission to undermine India's democracy.
