இந்தியா 2047-ல் வளர்ச்சியடைந்த நாடாக உயர ‘வந்தே மாதரம்’ ஊக்குவிக்கும் என்று மக்களவையில் பேசிய பிரதமர் மோடி தெரிவித்தார்.
நாட்டின் தேசியப் பாடலான வந்தே மாதரம் பாடலின் 150-வது ஆண்டு நிறைவு குறித்து இன்று நாடாளுமன்ற மக்களவையில் சிறப்பு விவாதம் தொடங்கியது. இதை பிரதமர் மோடி தொடங்கி வைத்து உரையாற்றினார். அவர் பேசியதாவது;
“வந்தே மாதரம் 150-வது ஆண்டு விழா விவாதத்தில் பங்கேற்பது பெருமை. இது வரலாற்று சிறப்பு மிக்க தருணம். வந்தே மாதரம் விவகாரத்தில் ஆளும் கட்சி, எதிர்க்கட்சி என்றெல்லாம். ஏதுமில்லை. வந்தே மாதரம் ஊக்குவித்த சுதந்திர போராட்டத்தினால் நாம் இன்று சுதந்திரமாக இங்கு அமர்ந்திருக்கிறோம். வந்தே மாதரம் என்பது வெறும் சுதந்திரப் போராட்டத்திற்கான முழக்கம் மட்டுமல்ல, சுதந்திர தாய்க்கான பாடல். அனைத்து இந்தியர்களின் நம்பிக்கை.
வந்தே மாதரம் பல கட்டங்களை கடந்து வந்துள்ளது. வந்தே மாதரத்தை பிரிட்டன் மகாராணி வாழ்க என்று பாட வைக்க ஆங்கிலேயர்கள் விரும்பினார்கள். பலம் வாய்ந்த பிரிட்டனை எதிர்க்க 1875-ம் ஆண்டு பங்கிம் சாட்டர்ஜி, வந்தே மாதரம் பாடலைக் கொடுத்தார். அதன் 50-வது ஆண்டு விழாவின்போது நமக்கு விடுதலை கிடைக்கவில்லை. 100-வது ஆண்டு விழாவின்போது முந்தைய அரசின் காரணமாக நாடு அவசரநிலையைச் சந்தித்தது. இப்போது 150-வது ஆண்டைக் காண்கிறது. 2047-ல் வளர்ச்சியடைந்த நாடாக இந்தியா உருவாக, வந்தே மாதரம் நம்மை ஊக்குவிக்கும்.
முஸ்லிம் லீக் வந்தே மாதரத்தை கடுமையாக எதிர்க்கத் தொடங்கியது. முகமது அலி ஜின்னா 1937 அக்டோபர் 15 அன்று லக்னோவிலிருந்து வந்தே மாதரத்திற்கு எதிராக ஒரு முழக்கத்தை எழுப்பினார். முஸ்லிம் லீக்கின் ஆதாரமற்ற கூற்றுகளுக்கு வலுவான மற்றும் பொருத்தமான பதிலைக் கொடுத்த போதிலும், நேரு வந்தே மாதரத்தை ஆராய்ந்தார். இதற்கு ஐந்து நாட்களுக்குப் பிறகு, முகமது அலி ஜின்னாவின் உணர்வுகளுடன் தான் உடன்படுவதாகக் குறிப்பிட்டு, 'ஆனந்த மடத்தில் வந்தே மாதரத்தின் பின்னணி முஸ்லிம்களை எரிச்சலடையச் செய்யலாம்' என்று நேதாஜி சுபாஷ் சந்திர போஸுக்கு அவர் ஒரு கடிதம் எழுதினார்...
அதற்குப் பிறகு, அக்டோபர் 26 முதல் வங்காளத்தில், வந்தே மாதரத்தின் பயன்பாடு பகுப்பாய்வு செய்யப்படும் என்று காங்கிரஸ் கூறியது. துரதிர்ஷ்டவசமாக, அக்டோபர் 26 அன்று, காங்கிரஸ் வந்தே மாதரத்தில் சமரசம் செய்து கொண்டது. அவர்கள் பாடலை இரண்டாகப் பிரித்தனர். சமூக நல்லிணக்கத்தைப் பின்னணியாகக் கொண்டு இந்த முடிவை எடுத்ததாக காங்கிரஸ் கூறினாலும், முஸ்லிம் லீகின் முன் காங்கிரஸ் மண்டியிட்டது என்பதுதான் வரலாறு. இதனால் இந்தியப் பிரிவினைக்கு ஒப்புக்கொள்ள வேண்டியிருந்தது. காங்கிரஸ் கொள்கைகள் இன்னும் அப்படியே உள்ளன. மேலும் வழியில், இந்திய தேசிய காங்கிரஸ் முஸ்லிம் லீக் காங்கிரஸ் ஆக மாறிவிட்டது. இன்றும் கூட, காங்கிரசும் அதன் கூட்டணிக் கட்சிகளும் வந்தே மாதரத்தை எதிர்க்கின்றன, அதைச் சுற்றி சர்ச்சையை உருவாக்க முயற்சிக்கின்றன” என்றார்.
Speaking in the Lok Sabha, Prime Minister Modi said that 'Vande Mataram' will encourage India to become a developed country by 2047.
