குடியரசு துணைத் தலைவர் தேர்தலில் தேசிய ஜனநாயகக் கூட்டணி வேட்பாளர் சி.பி. ராதாகிருஷ்ணன் வெற்றி பெற்றுள்ளார்.
452 வாக்குகளைப் பெற்ற சி.பி. ராதாகிருஷ்ணன், நாட்டின் 15-வது குடியரசு துணைத் தலைவராகிறார். எதிர்த்துப் போட்டியிட்ட இண்டியா கூட்டணி வேட்பாளர் சுதர்சன் ரெட்டி 300 வாக்குகளைப் பெற்றார்.
குடியரசு துணைத் தலைவர் பதவிக்கான தேர்தல் செவ்வாய்க்கிழமை காலை 10 மணிக்குத் தொடங்கியது. தேசிய ஜனநாயகக் கூட்டணி சார்பில் சி.பி. ராதாகிருஷ்ணன் போட்டியிட்டார். இண்டியா கூட்டணி சார்பில் சுதர்சன் ரெட்டி போட்டியிட்டார்.
குடியரசு துணைத் தலைவர் தேர்தலில் முதல் நபராக பிரதமர் நரேந்திர மோடி வாக்களித்தார். பிஜு ஜனதா தளம், பாரத ராஷ்ட்ரி சமிதி, ஷிரோமணி அகாலி தளம் ஆகிய கட்சிகள் தேர்தலைப் புறக்கணித்தன.
மாலை 5 மணிக்கு வாக்குப்பதிவு நிறைவடைந்ததைத் தொடர்ந்து, மாலை 6 மணிக்கு மேல் வாக்கு எண்ணிக்கை நடத்தி முடிக்கப்பட்டது. தேர்தல் அதிகாரியாக நியமிக்கப்பட்டுள்ள பிசி மோடி முடிவுகளை வெளியிட்டார்.
"தேசிய ஜனநாயகக் கூட்டணி வேட்பாளரும் மஹாராஷ்டிர ஆளுநருமான சி.பி. ராதாகிருஷ்ணன் 452 வாக்குகளைப் பெற்றார். அவர் நாட்டின் குடியரசு துணைத் தலைவராகத் தேர்ந்தெடுக்கப்பட்டுள்ளார். எதிர்க்கட்சியினரின் வேட்பாளர் சுதர்சன் ரெட்டி 300 வாக்குகளைப் பெற்றார். மொத்தம் 767 வாக்குகள் பதிவாகின. இவர் 15 வாக்குகள் செல்லாத வாக்குகள்" என்றார் பிசி மோடி.
குடியரசு துணைத் தலைவர் தேர்தலுக்கு முன்பு, எதிர்க்கட்சிகள் சார்பில் 315 நாடாளுமன்ற உறுப்பினர்களும் ஒற்றுமையாக இருப்பதாக காங்கிரஸ் உறுதிபடத் தெரிவித்தது. ஆனால், சுதர்சன் ரெட்டி 300 வாக்குகளை மட்டுமே பெற்றுள்ளார். தேசிய ஜனநாயகக் கூட்டணிக்கு 438 உறுப்பினர்களின் பலம் இருந்த நிலையில், சிபி ராதாகிருஷ்ணன் 452 வாக்குகளைப் பெற்றுள்ளார். இதன்மூலம், எதிர்க்கட்சி தரப்பிலிருந்து சிலர் தேசிய ஜனநாயகக் கூட்டணி வேட்பாளர் சி.பி. ராதாகிருஷ்ணனுக்கு ஆதரவாக வாக்களித்ததாகத் தெரிகிறது. 14 பேர் தேசிய ஜனநாயகக் கூட்டணி வேட்பாளருக்கு ஆதரவாக வாக்களித்ததாக பாஜக தலைவர்கள் கோரி வருகிறார்கள்.
இதன்மூலம், தமிழ்நாட்டைச் சேர்ந்த சி.பி. ராதாகிருஷ்ணன் நாட்டின் 15-வது குடியரசு துணைத் தலைவராகத் தேர்வாகியுள்ளார். இவருக்கு நாடு முழுக்க கட்சி வேறுபாடின்றி தலைவர்கள் வாழ்த்துகளைத் தெரிவித்து வருகிறார்கள்.
செப்டம்பர் 12 அன்று குடியரசு துணைத் தலைவராகப் பதவியேற்கிறார் சி.பி. ராதாகிருஷ்ணன். பிரதமர் நரேந்திர மோடி, சி.பி. ராதாகிருஷ்ணனை நேரில் சந்தித்து வாழ்த்து தெரிவித்தார்.
Vice President Election | CP Radhakrishnan | Jagdeep Dhankar | Sudershan Reddy | Sudarshan Reddy | NDA Candidate | INDIA Alliance candidate |
