டி20 உலகக் கோப்பை தொடங்கி 26 ஆட்டங்கள் முடிந்த நிலையில் சூப்பர் 8 சுற்றுக்குள் நுழைய ஒவ்வொரு அணிகளுக்கும் எந்த அளவிற்கு வாய்ப்புள்ளது என்பதைப் பார்க்கலாம்.
டி20 உலகக் கோப்பை கடந்த ஜூன் 1 அன்று தொடங்கி நடைபெற்று வருகிறது. இதில், ஆஸ்திரேலியா, இந்தியா, மே.இ. தீவுகள் மற்றும் தென்னாப்பிரிக்கா ஆகிய அணிகள் தலா 3 வெற்றிகளுடன் சூப்பர் 8 சுற்றுக்குத் தகுதி பெற்றுள்ளன. இந்நிலையில் நடப்பு சாம்பியனான இங்கிலாந்து, இலங்கை மற்றும் நியூசிலாந்து ஆகிய அணிகளுக்கு சூப்பர் 8 சுற்றுக்கான வாய்ப்பு சற்று குறைவாகவே இருக்கிறது என்றுதான் கூறவேண்டும்.
சூப்பர் 8 சுற்றுக்குள் நுழைய அணிகள் என்ன செய்ய வேண்டும்?
இலங்கை:
இலங்கை அணிக்கு வீரர்களுடன் சேர்ந்து மழையும் உதவினால் மட்டுமே அந்த அணி அடுத்தச் சுற்றுக்குத் தகுதிப் பெற முடியும். 1 புள்ளியை மட்டுமே பெற்றிருக்கும் இலங்கை அணி, வங்தேசம் - நெதர்லாந்து ஆட்டத்தில் முடிவு கிடைத்தாலே வெளியேறும். இதில் ஏதாவது ஒரு அணி வெற்றி பெறும் பட்சத்தில் 4 புள்ளிகளைப் பெறும். அப்படி நடந்தால் இலங்கை அணி தனது கடைசி ஆட்டத்தில் வெற்றி பெற்றாலும் வெளியேறும். ஒருவேளை அந்த ஆட்டம் மழையால் ரத்து ஆகி, நேபாள் அணி வங்கதேசத்தை வீழ்த்தி, இலங்கை அணி தனது கடைசி ஆட்டத்தில் வெற்றி பெற்றால் இலங்கை, வங்கதேசம், நெதர்லாந்து ஆகிய மூன்று அணிகளும் 3 புள்ளிகளுடன் இருக்கும். அவ்வாறு நடந்தாலும் இலங்கை அணி சூப்பர் 8 சுற்றுக்குள் நுழைய நல்ல ரன்ரேட் தேவைப்படும். இன்று நடைபெறும் நெதர்லாந்து - வங்தேசம் ஆட்டத்தில் எந்த அணி வெற்றி பெற்றாலும் அந்த அணிக்கு சூப்பர் 8 வாய்ப்பு பிரகாசமாக இருக்கும்.
நியூசிலாந்து:
முதல் ஆட்டத்தில் ஆப்கானிஸ்தான் அணிக்கு எதிராக மிகப்பெரிய தோல்வியைச் சந்தித்த நியூசிலாந்து அணி, இன்று மே.இ. தீவுகள் அணிக்கு எதிராகவும் தோல்வியடைந்தது. இதன் மூலம் அந்த அணிக்கு சூப்பர் 8 வாய்ப்பு மிகவும் குறைந்துள்ளது. இப்பிரிவில் மே.இ. தீவுகள் அணி அடுத்தச் சுற்றுக்குத் தகுதி பெற்றது. ஆப்கானிஸ்தான் அணிக்கு இன்னும் இரு ஆட்டங்கள் மீதமுள்ளது. இரண்டிலும் பெரிய தோல்வியைத் (இரு ஆட்டங்களையும் சேர்த்து 120 ரன்கள் வித்தியாசத்தில் தோல்வி) தழுவி, நியூசிலாந்து அணி தனது கடைசி இரு ஆட்டங்களிலும் மிகப்பெரிய வெற்றியைப் (இரு ஆட்டங்களையும் சேர்த்து 187 ரன்கள் வித்தியாசத்தில் வெற்றி) பெறும் பட்சத்தில் நியூசிலாந்து அணி சூப்பர் 8 சுற்றுக்குள் நுழையும். ஆப்கானிஸ்தான் அணி அடுத்த ஆட்டத்தில் பப்புவா நியூ கினியாவுடன் மோதவுள்ளது. இதில் வெற்றி பெற்றாலே ஆப்கானிஸ்தான் அணி 2-வது அணியாக சூப்பர் 8 சுற்றுக்குத் தகுதி பெறும்.
பாகிஸ்தான்:
3 ஆட்டங்களில் விளையாடி ஒரு வெற்றியுடன் 2 புள்ளிகளில் இருக்கும் பாகிஸ்தான் அணி தனது கடைசி ஆட்டத்தில் அயர்லாந்துடன் மோதுகிறது. இந்த ஆட்டம் மழையால் பாதிக்க வாய்ப்புள்ளதாகத் தெரிகிறது. அப்படி இந்த ஆட்டம் மழையால் கைவிடப்பட்டால் பாகிஸ்தான் அணிக்கு ஒரு புள்ளி கிடைக்கும். ஏற்கெனவே அமெரிக்க அணி 4 புள்ளிகளுடன் இருப்பதால், பாகிஸ்தான் அணி வெளியேறும். பாகிஸ்தான் அணி இந்த ஆட்டத்தில் வெற்றி பெற்றாலும், அமெரிக்க அணியின் முடிவுகளைப் பொருத்தே பாகிஸ்தான் அணி சூப்பர் 8 சுற்றுக்குத் தகுதிப் பெறுமா என்பது தெரியவரும். அமெரிக்க அணி நேற்று இந்திய அணிக்கு எதிராக தோல்வியடைந்த காரணத்தால், அந்த அணியின் நெட் ரன் ரேட் பாகிஸ்தானை விட குறைந்துள்ளது. எனவே அமெரிக்க அணிக்கும் கடைசி ஆட்டம் முக்கியமான ஆட்டமாகும். ஆனால், அமெரிக்க அணி அதில் வெற்றி பெற்றாலே சூப்பர் 8 சுற்றுக்குள் நுழைய போதுமானது. இரண்டு ஆட்டங்களும் மழையால் கைவிடப்பட்டால், அமெரிக்க அணி அடுத்தச் சுற்றுக்கு முன்னேறும்.
இங்கிலாந்து:
நடப்பு சாம்பியனான இங்கிலாந்து அணி இன்னும் ஓமன் மற்றும் நமீபிய அணிகளுக்கு எதிராக விளையாடவுள்ளது. இப்பிரிவில் ஸ்காட்லாந்து அணி 5 புள்ளிகளுடன் 2-வது இடத்தில் உள்ளது. இங்கிலாந்து அணி இனிவரும் 2 ஆட்டங்களில் வெற்றி பெற்றால் 5 புள்ளிகளை பெறும். ஆனால், ஸ்காட்லாந்து அணி நல்ல ரன்ரேட்டுடன் இருப்பதால் இங்கிலாந்து அணி பெரிய வெற்றிகளைப் பெற வேண்டும். அதாவது, இரு ஆட்டங்களையும் சேர்த்து 94 ரன்கள் வித்தியாசத்தில் வெற்றி பெற்று, ஸ்காட்லாந்து அணி தனது கடைசி ஆட்டத்தில் ஆஸ்திரேலியாவுக்கு எதிராக 20 ரன்கள் வித்தியாசத்தில் (161 ரன்கள் இலக்காக இருக்கும்போது) தோல்வியடையும் பட்சத்தில் இங்கிலாந்து அணி ஸ்காட்லாந்தை விட அதிகமான ரன்ரேட்டை பெறும். இங்கிலாந்து அணி விளையாடும் ஆட்டங்களும் மழையால் பாதிக்க வாய்ப்புள்ளதாகத் தெரிகிறது. அப்படி நடந்தால் இங்கிலாந்து அணியின் உலகக் கோப்பை கனவு கலைந்துவிடும்.
