இங்கிலாந்துக்கு எதிரான நான்காவது டெஸ்டில் காயமடைந்துள்ள ரிஷப் பந்த், பேட்டிங் மட்டும் செய்வார் என பிசிசிஐ அதிகாரபூர்வமாக அறிவித்துள்ளது.
இந்தியா, இங்கிலாந்து இடையிலான நான்காவது டெஸ்ட் மான்செஸ்டரில் நடைபெற்று வருகிறது. முதல் நாள் ஆட்டத்தில் இந்திய கேப்டன் ஷுப்மன் கில் ஆட்டமிழந்தவுடன் விக்கெட் கீப்பிங் பேட்டர் ரிஷப் பந்த் களமிறங்கினார். இவர் சாய் சுதர்சனுடன் இணைந்து நல்ல கூட்டணியை அமைத்து விளையாடி வந்தார்.
68-வது ஓவரில் 37 ரன்களுடன் நன்றாக பேட் செய்துகொண்டிருந்தபோது, ரிவர்ஸ் ஸ்வீப் ஷாட்டுக்கு முயன்றார். அப்போது அவருடைய காலில் காயம் ஏற்பட்டது. ஷுவில் பட்ட பந்து, அவர் காலைப் பதம் பார்த்து ரத்தம் வரச் செய்து வீக்கத்தையும் உண்டாக்கியது. இதனால் வலியால் துடித்த ரிஷப் பந்த் வேறு வழியில்லாமல் ரிடையர்ட் ஹர்ட் ஆனார். நடக்கவே முடியாமல் வாகனத்தில் அழைத்துச் செல்லப்பட்டார்.
ஸ்கேன் செய்வதற்காக ரிஷப் பந்த் அழைத்துச் செல்லப்பட்டுள்ளதாகவும் மருத்துவக் குழு கண்காணித்து வருவதாகவும் பிசிசிஐ அதிகாரபூர்வமாக நேற்று தெரிவித்தது. இதைத் தொடர்ந்து, ரிஷப் பந்துக்கு எலும்பு முறிவு ஏற்பட்டுள்ளதாகவும், 6 வாரங்களுக்கு அவர் ஓய்வெடுக்க அறிவுறுத்தப்பட்டுள்ளதாகவும் தகவல் வெளியானது.
எனினும், வலி மாத்திரை ஏதேனும் கொடுத்து அவரை பேட்டிங் மட்டும் செய்ய வைக்க முடியுமா என்பதற்கான வாய்ப்பு குறித்து மருத்துவக் குழு பரிசீலித்து வருவதாகத் தகவல்கள் வெளியாகின. இந்நிலையில், ரிஷப் பந்த் உடல்நிலை குறித்து அதிகாரபூர்வ அறிவிப்பு வெளியாகியுள்ளது.
"மான்செஸ்டர் டெஸ்டின் முதல் நாளில் ரிஷப் பந்துக்குக் காலில் காயம் ஏற்பட்டது. இந்த டெஸ்டில் அவர் விக்கெட் கீப்பிங் பணியைச் செய்ய மாட்டார். விக்கெட் கீப்பராக துருவ் ஜுரெல் செயல்படுவார். காயமடைந்திருந்தாலும், ரிஷப் பந்த் இரண்டாம் நாள் ஆட்டத்தில் இந்திய அணியுடன் இணைந்துள்ளார். அணியின் தேவைக்கேற்ப அவர் பேட் செய்வார்" என்று பிசிசிஐ சார்பில் எக்ஸ் தளப் பக்கத்தில் பதிவிடப்பட்டுள்ளது.
Ind v Eng | India v England | Ind vs Eng | India vs England | Yashasvi Jaiswal | Sai Sudharsan | KL Rahul | Rishabh Pant | Ben Stokes | Anshul Kamboj | Liam Dawson | Old Trafford | Old Trafford Test | Manchester | Manchester Test | Pant Injury | India Tour of England | India England Series | Pant Fracture | Rishabh Pant Injury | Rishabh Pant ruled out | Ishan Kishan
