![எலிமினேட்டர் சுற்றில் ராஜஸ்தான் வெற்றி!](http://media.assettype.com/kizhakkunews%2F2024-05%2Fe91b6bbc-ec25-4b29-8824-ef7069f19c3b%2F20240522300L_OrJaD9Q.jpg?w=480&auto=format%2Ccompress&fit=max)
ஆர்சிபி அணிக்கு எதிரான எலிமினேட்டர் ஆட்டத்தில் ராஜஸ்தான் அணி 4 விக்கெட்டுகள் வித்தியாசத்தில் வெற்றி பெற்றது.
நடப்பு ஐபிஎல் பருவத்தின் எலிமினேட்டர் ஆட்டத்தில் ஆர்சிபி - ராஜஸ்தான் அணிகள் அஹமதாபாதில் விளையாடின. டாஸ் வென்ற ராஜஸ்தான் அணி பந்துவீச்சைத் தேர்வு செய்தது.
சற்று அதிரடியாக தொடங்கிய கேப்டன் டு பிளெஸ்ஸி ஒரு சிக்ஸர், 2 பவுண்டரிகளுடன் 14 பந்துகளில் 17 ரன்கள் எடுத்து போல்ட் பந்தில் வெளியேறினார். மறுமுனையில் அதிரடியாக விளையாடிய விராட் கோலி ஒரு சிக்ஸர், 3 பவுண்டரிகளுடன் 24 பந்துகளில் 33 ரன்கள் எடுத்து சஹால் பந்தில் ஆட்டமிழந்தார்.
இதன் பிறகு கிரீன் - பட்டிதார் கூட்டணி அமைத்து 41 ரன்கள் சேர்க்க, கிரீன் ஒரு சிக்ஸர், 2 பவுண்டரிகளுடன் 21 பந்துகளில் 27 ரன்கள் எடுத்து அஸ்வின் பந்தில் ஆட்டமிழந்தார். அஸ்வினின் அசத்தலான பந்துவீச்சில் மேக்ஸ்வெல் முதல் பந்திலேயே டக் அவுட் ஆகி வெளியேறினார்.
இதன் பிறகு லாம்ரோர் - பட்டிதார் ஜோடி சேர்ந்து அணியின் ஸ்கோரை வேகமாக உயர்த்தினர். பட்டிதார் 2 சிக்ஸர்கள், 2 பவுண்டரிகளுடன் 22 பந்துகளில் 34 ரன்கள் எடுத்து ஆட்டமிழந்தார். இதன் பிறகு தினேஷ் கார்த்திக் 11 ரன்களில் வெளியேறினார். லாம்ரோர் 2 சிக்ஸர்கள், 2 பவுண்டரிகளுடன் 17 பந்துகளில் 32 ரன்கள் எடுத்து ஆட்டமிழந்தார். இந்த மூன்று விக்கெட்டுகளையும் அவேஷ் கான் வீழ்த்தினார்.
அஸ்வின் 4 ஓவர்களில் 19 ரன்கள் மட்டுமே கொடுத்து 2 விக்கெட்டுகளை வீழ்த்தினார். போல்ட் 4 ஓவர்களில் 16 ரன்கள் மட்டுமே கொடுத்து 1 விக்கெட்டை வீழ்த்தினார். ஆர்சிபி அணி 20 ஓவர்கள் முடிவில் 8 விக்கெட்டுகள் இழப்புக்கு 172 ரன்கள் எடுத்தது.
இதைத் தொடர்ந்து விளையாடிய ராஜஸ்தான் அணிக்கு டாம் கோலர் கேட்மோர் - ஜெயிஸ்வால் நல்ல தொடக்கத்தை அமைத்து தந்தனர். கேட்மோர் 4 பவுண்டரிகளுடன் 15 பந்துகளில் 20 ரன்கள் எடுத்து வெளியேறினார். மறுமுனையில் ஜெயிஸ்வால் அதிரடியாக விளையாடி ரன்களை வேகமாக சேர்த்தார்.
ஜெயிஸ்வால் 8 பவுண்டரிகளுடன் 30 பந்துகளில் 45 ரன்கள் எடுத்து வெளியேற, அடுத்ததாக சாம்சன் 17 ரன்களில் வெளியேறினார். இதன் பிறகு ஜுரெல் எதிர்பாராத வகையில் ரன் அவுட் ஆனார். 5 ஓவர்களில் 47 ரன்கள் தேவைப்பட்டது. ரியான் பராக் - ஹெட்மயர் களத்தில் இருந்தனர்.
இருவரும் அதிரடியாக விளையாடி 45 ரன்களை சேர்த்தனர். பராக் 2 சிக்ஸர்கள், 2 பவுண்டரிகளுடன் 26 பந்துகளில் 36 ரன்கள் எடுத்து ஆட்டமிழந்தார். இதைத் தொடர்ந்து ஹெட்மயர் ஒரு சிக்ஸர், 3 பவுண்டரிகளுடன் 14 பந்துகளில் 26 ரன்கள் எடுத்து வெளியேறினார்.
இவர்களது விக்கெட்டை சிராஜ் வீழ்த்தினார். முடிவில் பவல் ஒரு சிக்ஸர், 2 பவுண்டரிகளுடன் 8 பந்துகளில் 16 ரன்கள் எடுத்து ஆட்டத்தை 6 பந்துகள் மீதமிருந்த நிலையில் முடித்தார். 19 ஓவர்களில் இலக்கை எட்டி 4 விக்கெட்டுகள் வித்தியாசத்தில் ராஜஸ்தான் அணி வெற்றி பெற்றது.
இந்த வெற்றியின் மூலம் ராஜஸ்தான் அணி 2-வது தகுதிச் சுற்றுக்கான ஆட்டத்தில் சன்ரைசர்ஸ் அணியுடன் வருகிற 24 அன்று விளையாடவுள்ளது. இந்த ஆட்டத்தில் வெற்றி பெறும் அணி இறுதிச் சுற்றில் கேகேஆர் உடன் மோதும். இந்த தோல்வியின் மூலம் ஆர்சிபி அணியின் கோப்பை கனவு தகர்ந்தது.