ஐசிசி டெஸ்ட் தரவரிசையில் இந்தியச் சுழற்பந்து வீச்சாளர் அஸ்வின் நெ.1 இடத்துக்கு மீண்டும் முன்னேறியுள்ளார்.
இங்கிலாந்துக்கு எதிரான கடைசி டெஸ்டில் 9 விக்கெட்டுகளை எடுத்ததால் டெஸ்ட் பந்துவீச்சாளர்களுக்கான தரவரிசையில் முதல் இடத்தை அடைந்துள்ளார். இதுவரை ஆறு முறை நெ.1 இடத்தை அவர் பிடித்துள்ளார். ஆஸி. வேகப்பந்து வீச்சாளர் ஹேஸில்வுட் 2-வது இடத்துக்கு முன்னேறியுள்ளார். முதல் இடத்தில் இருந்த பும்ரா, 3-வது இடத்துக்கு இறங்கியுள்ளார். குல்தீப் யாதவ், 15 இடங்கள் முன்னேறி, 16-வது இடத்தைப் பிடித்துள்ளார்.
ஐசிசி டெஸ்ட் பேட்டர்கள் தரவரிசையில் ரோஹித் சர்மா 6-வது இடத்துக்கும் ஜெயிஸ்வால் 8-வது இடத்துக்கும் ஷுப்மன் கில் 20-வது இடத்துக்கும் முன்னேறியுள்ளார்கள். 9 டெஸ்டுகளில் 740 புள்ளிகள் எடுத்துள்ளார் ஜெயிஸ்வால். இதுபோல 9 டெஸ்டுகளின் முடிவில் பிராட்மேன் (752), மைக் ஹஸ்ஸி (741) ஆகியோர் மட்டுமே அதிக புள்ளிகளைப் பெற்றிருந்தார்கள்.
டெஸ்ட், ஒருநாள், டி20 என மூன்று வகை கிரிக்கெட் போட்டிகளிலும் இந்திய அணியே முதலிடத்தில் உள்ளது.