பாரிஸ் பாராலிம்பிக்ஸ் நிறைவு: பதக்கப் பட்டியலில் சீனா முதலிடம்!

ஃபிரான்ஸ் தலைநகர் பாரிஸில் கடந்த ஆகஸ்ட் 28 அன்று தொடங்கிய பாராலிம்பிக்ஸ் நேற்று நிறைவு பெற்றது.

இந்த பாராலிம்பிக்ஸில் 169 நாடுகளைச் சேர்ந்த 4,400 வீரர், வீராங்கனைகள் கலந்து கொண்டனர்.

இந்தியா சார்பாக 12 வகையிலான விளையாட்டுகளில் 84 வீரர், வீராங்கனைகள் பங்கேற்றனர்.

பதக்கப் பட்டியலில் 94 தங்கம், 76 வெள்ளி, 50 வெண்கலப் பதக்கங்கள் என மொத்தம் 220 பதக்கங்களுடன் முதலிடத்தைப் பிடித்தது சீனா.

கிரேட் பிரிட்டன் 49 தங்கம், 44 வெள்ளி, 31 வெண்கலப் பதக்கங்கள் என மொத்தம் 124 பதக்கங்களுடன் 2-வது இடத்தைப் பிடித்தது.

அமெரிக்கா 36 தங்கம், 42 வெள்ளி, 27 வெண்கலப் பதக்கங்கள் என மொத்தம் 105 பதக்கங்களுடன் 3-வது இடத்தைப் பிடித்தது.

இந்தியா 7 தங்கம், 9 வெள்ளி, 13 வெண்கலம் என மொத்தம் 29 பதக்கங்களுடன் பதக்கப் பட்டியலில் 18-வது இடத்தைப் பிடித்தது.

இந்தியாவுக்கு அதிக பதக்கங்களை வென்ற பாராலிம்பிக் போட்டியாக இது அமைந்தது.

முன்னதாக, 2020 பாராலிம்பிக்ஸில் இந்தியா 5 தங்கம், 8 வெள்ளி, 6 வெண்கலப் பதக்கங்கள் என மொத்தம் 19 பதக்கங்களை வென்று சாதனை படைத்திருந்தது.

இந்நிலையில் அந்த சாதனையை இந்த பாராலிம்பிக்ஸில் முறியடித்தது இந்தியா.