மத்தியப் பிரதேசத்துக்கு எதிரான ரஞ்சி கோப்பை ஆட்டத்தில் 4 விக்கெட்டுகளை வீழ்த்தி அசத்தியுள்ளார் முஹமது ஷமி.
கடைசியாக 2023 ஒருநாள் உலகக் கோப்பைப் போட்டியில் விளையாடிய ஷமி, அதன்பிறகு இந்திய அணி விளையாடிய எந்த ஒரு தொடரிலும் கணுக்கால் காயம் காரணமாகப் பங்கேற்கவில்லை.
இதைத் தொடர்ந்து காயத்துக்கு லண்டனில் அறுவை சிகிச்சை மேற்கொண்ட ஷமி, சில மாதங்களுக்கு முன்பு மீண்டும் தனது பயிற்சியைத் தொடங்கினார்.
பயிற்சியின் விளைவால் ஷமிக்கு முழங்கால் வீக்கம் ஏற்பட்டது. இதனால் கிரிக்கெட் போட்டிகளில் விளையாட மேலும் தாமதமாகும் என அறியப்பட்டது.
இதனால் ஆஸ்திரேலியாவில் பிஜிடி தொடரில் அவர் விளையாடுவது வாய்ப்பே இல்லை எனப் பார்க்கப்பட்டது. இந்திய அணியிலும் ஷமி இடம்பெறவில்லை. காயத்துடன் ஷமியை ஆஸ்திரேலியாவுக்கு அழைத்துச் செல்ல ரோஹித் சர்மாவும் விருப்பப்படவில்லை.
இந்நிலையில் மத்தியப் பிரதேசத்துக்கு எதிரான ரஞ்சி கோப்பை ஆட்டத்தில் பெங்கால் அணிக்காக ஷமி விளையாடுவார் என்று பெங்கால் கிரிக்கெட் சங்கம் அறிவித்தது.
மத்தியப் பிரதேசத்துக்கு எதிரான ஆட்டம் நேற்று தொடங்கியது. முதல் நாளில் ஒரு விக்கெட்டை கூட எடுக்காத ஷமி, இன்று 4 விக்கெட்டுகளை வீழ்த்தி அசத்தியுள்ளார். இதன் மூலம் முதல் இன்னிங்ஸில் மத்தியப் பிரதேச அணி 167 ரன்களுக்கு ஆட்டமிழந்தது.
ரஞ்சி கோப்பை ஆட்டங்களில் ஷமி நிரூபிக்கும் பட்சத்தில் பிஜிடி தொடரில் கடைசி 3 டெஸ்டுகளுக்கான இந்திய அணியில் ஷமி இடம்பெறுவார் என்று எதிர்பார்க்கப்படும் நிலையில், 4 விக்கெட்டுகளை வீழ்த்தி அசத்தியுள்ளார் முஹமது ஷமி.
