இந்தியா, இங்கிலாந்து இடையிலான நான்காவது டெஸ்ட் முதல் நாள் ஆட்டநேர முடிவில் இந்திய அணி 4 விக்கெட்டுகள் இழப்புக்கு 264 ரன்கள் எடுத்திருந்தது.
நான்காவது நாள் ஆட்டத்தை ரவீந்திர ஜடேஜா மற்றும் ஷார்துல் தாக்குர் தலா 19 ரன்களுடன் தொடங்கினார்கள். ஜடேஜா கூடுதலாக 1 ரன் மட்டும் எடுத்து ஜோஃப்ரா ஆர்ச்சர் பந்தில் ஆட்டமிழந்தார். ஷார்துல் தாக்குருடன் இணைந்து வாஷிங்டன் சுந்தர் கூட்டணியைக் கட்டமைக்க இந்தியா 300 ரன்களை தாண்டியது. பொறுப்பான பேட்டிங்கை வெளிப்படுத்திய ஷார்துல் தாக்குர் 41 ரன்களுக்கு ஆட்டமிழந்தார்.
முதல் நாள் ஆட்டத்தில் காலில் பந்து பட்டு ஏற்பட்ட காயத்தால் களத்திலிருந்து வாகனத்தில் வெளியேறிய ரிஷப் பந்த், இந்த டெஸ்டில் பேட்டிங் மட்டும் செய்வார் என பிசிசிஐ அறிவித்தது. எலும்பு முறிவு ஏற்பட்ட போதிலும் 37 ரன்களில் இருந்த ரிஷப் பந்த் 6 விக்கெட்டுகள் விழுந்தவுடன் போர் வீரனைப் போல ரசிகர்களின் ஆரவாரத்துக்கிடையே மீண்டும் களத்துக்குள் வந்தார். கஷ்டப்பட்டு விளையாடினாலும் தன்னால் முடிந்த அளவு ரன்களைச் சேர்க்க வேண்டும் என்கிற உறுதி அவருடைய ஆட்டத்தில் தெரிந்தது. பிறகு, வாஷிங்டன் சுந்தர் பென் ஸ்டோக்ஸின் ஷார்ட் பந்து உத்தியில் 27 ரன்களுக்கு ஆட்டமிழந்தார்.
வலியுடன் போராடி அரை சதம் அடித்த ரிஷப் பந்த், ஆர்ச்சர் வீசிய அட்டகாசமான பந்தில் 54 ரன்களுக்கு போல்டானார். கீழ் வரிசை பேட்டர்களிடமிருந்து மீண்டும் ரன்கள் வராததால், இந்தியா 358 ரன்களுக்கு ஆட்டமிழந்தது. ஸ்டோக்ஸ் 5 விக்கெட்டுகளையும் ஆர்ச்சர் 3 விக்கெட்டுகளையும் வீழ்த்தினார்கள்.
இங்கிலாந்து முதல் இன்னிங்ஸில் பென் டக்கெட் மற்றும் ஸாக் கிராலி இம்முறை பெரிய கூட்டணியை அமைத்து இந்தியப் பந்துவீச்சாளர்களைச் சோதித்தார்கள். தேநீர் இடைவேளையில் இங்கிலாந்து விக்கெட் இழப்பின்றி 78 ரன்கள் எடுத்தது. பென் டக்கெட் 46 பந்துகளில் அரை சதம் அடித்தார். கிராலி 73 பந்துகளில் அரை சதம் அடித்தார். 28.4 ஓவர்களில் இந்தக் கூட்டணி 150 ரன்களை தாண்டியது.
ரவீந்திர ஜடேஜா வந்தவுடன் முதல் விக்கெட்டாக கிராலி 84 ரன்களுக்கு ஆட்டமிழந்தார். அன்ஷுல் கம்போஜ் தனது முதல் டெஸ்ட் விக்கெட்டாக சதத்தை நெருங்கிக் கொண்டிருந்த பென் டக்கெட்டை 94 ரன்களுக்கு வீழ்த்தினார். இரு தொடக்க வீரர்களையும் வீழ்த்தியது இந்தியாவுக்கு நிம்மதி தந்தாலும், இரண்டாவது நாள் ஆட்டநேர முடிவில் இங்கிலாந்து 2 விக்கெட்டுகளை இழந்து 225 ரன்கள் எடுத்து நல்ல நிலையிலேயே உள்ளது. ஆலி போப் 20 ரன்களுடனும், ஜோ ரூட் 11 ரன்களுடனும் களத்தில் உள்ளார்கள்.
Ind v Eng | India v England | Ind vs Eng | India vs England | Rishabh Pant | Ben Stokes | Anshul Kamboj | Old Trafford | Old Trafford Test | Manchester | Manchester Test | Pant Injury | India Tour of England | India England Series | Zak Crawly | Ben Duckett | Ravindra Jadeja
