இந்திய வீரர் செதேஷ்வர் புஜாரா அனைத்து விதமான கிரிக்கெட்டிலிருந்தும் ஓய்வு பெறுவதாக இன்று அறிவித்துள்ளார். புஜாரா ஓய்வு பெற்றாலும் அவருடைய பல சாதனைகளை இனியும் முறியடிக்க முடியுமா என்பது சந்தேகமே.
முறியடிக்க முடியாத புஜாராவின் சாதனைகள்
தென்னாப்பிரிக்கா, இங்கிலாந்து, நியூசிலாந்து, ஆஸ்திரேலியா என சேனா நாடுகளில் அதிக டெஸ்ட் வெற்றிகளைக் கண்ட (11) இந்திய வீரர்களில் புஜாராவுக்கே முதலிடம். விராட் கோலி, ரஹானே, ரிஷப் பந்த், பும்ரா மற்றும் கேஎல் ராகுல் ஆகியோர் சேனா நாடுகளில் தலா 10 வெற்றிகளைக் கண்டுள்ளார்கள்.
டெஸ்டில் ஓர் இன்னிங்ஸில் 500-க்கும் மேற்பட்ட பந்துகளை எதிர்கொண்ட ஒரே இந்தியர் புஜாரா. 2017-ல் ராஞ்சியில் ஆஸ்திரேலியாவுக்கு எதிராக 525 பந்துகொண்டு 202 ரன்கள் எடுத்தார். இவருக்கு அடுத்ததாக 495 பந்துகளை எதிர்கொண்டு 2-வது இடத்தில் உள்ளார் டிராவிட்.
முதல் தர கிரிக்கெட்டில் அதிக இரட்டைச் சதங்கள் அடித்த இந்திய வீரர் புஜாரா தான். இவர் 18 இரட்டைச் சதங்கள் அடித்துள்ளார். இவருக்கு அடுத்ததாக விஜய் மெர்சண்ட், 11 இரட்டைச் சதங்கள் எடுத்துள்ளார்.
இது விநோதமான சாதனை. டெஸ்ட் கிரிக்கெட்டில் முதல் ரன்னை எடுப்பதற்கு அதிகப் பந்துகளை எதிர்கொண்ட இந்திய பேட்டர் புஜாரா தான். 2018-ல் ஜொகனஸ்பர்கில் தென்னாப்பிரிக்காவுக்கு எதிராக முதல் இன்னிங்ஸில் 54-வது பந்தில் தான் முதல் ரன்னை எடுத்தார்.
இந்தியாவுக்காக 2-வது அதிக ரன்கள் எடுத்த ஜோடி புஜாரா - விஜய். 2,615 ரன்கள். சராசரி - 65.37. 9 முறை இக்கூட்டணி 100 ரன்கள் எடுத்துள்ளன.
இந்தியாவுக்காக 100-க்கும் (103) மேற்பட்ட டெஸ்டுகளில் விளையாடிய 14 வீரர்களில் புஜாராவும் ஒருவர்.
இந்தியாவுக்காக டெஸ்டில் நெ. 3-ல் அதிக ரன்கள் மற்றும் அதிக சதங்கள் அடித்தவர்களில் ராகுல் டிராவிட்டுக்கு அடுத்து புஜாரா தான். ராகுல் டிராவிட் - 10,524 ரன்கள், சதங்கள் - 28; புஜாரா - 6,529 ரன்கள், சதங்கள் 18.
4 டெஸ்டுகள் கொண்ட தொடரில் அதிக பந்துகளை எதிர்கொண்ட இந்திய வீரர்களில் டிராவிட்டுக்கு அடுத்து புஜாரா தான். 2002 இங்கிலாந்து டெஸ்ட் தொடரில் டிராவிட் 1,336 பந்துகளையும் 2018-19 பிஜிடி தொடரில் புஜாரா 1,258 பந்துகளையும் எதிர்கொண்டுள்ளார்கள்.
முதல் தர கிரிக்கெட்டில் காவஸ்கர், சச்சின், டிராவிடுக்கு அடுத்ததாக அதிக ரன்கள் எடுத்த இந்திய வீரர்களில் புஜாராவுக்கு 4-வது இடம். 21,301 ரன்கள் எடுத்துள்ளார்.
Cheteshwar Pujara | Pujara | Pujara retires | Pujara records |
