கேன்டிடேட்ஸ் செஸ் சாம்பியன்ஷிப் போட்டியின் 12-வது சுற்றில் இந்திய வீரர் குகேஷ் வெற்றி பெற்றுள்ளார்.
கனடாவில் நடைபெற்று வரும் இப்போட்டியில் ஆண்கள் மற்றும் பெண்கள் பிரிவில் தலா 8 பேர் என மொத்தம் 16 வீரர்கள் தகுதி பெற்றுள்ளனர்.
இப்போட்டி ஏப்ரல் 3 அன்று தொடங்கியது. இந்தியாவிலிருந்து ஆண்கள் பிரிவில் பிரக்ஞானந்தா, டி. குகேஷ், விதித் குஜராத்தி மற்றும் பெண்கள் பிரிவில் வைஷாலி, கொனேரு ஹம்பி என 5 பேர் பங்கேற்றுள்ளனர்.
நடப்பு உலக சாம்பியனுடன் மோதும் வீரர் மற்றும் வீராங்கனையை முடிவு செய்யும் இப்போட்டி ஏப்ரல் 23 வரை நடைபெறுகிறது.
இந்நிலையில் இப்போட்டியில் 12 சுற்றுகள் முடிவடைந்தன. 12-வது சுற்றில் இந்திய வீரர் குகேஷ் வெற்றி பெற்றார். இதன் மூலம் ஆண்கள் பிரிவில் டி.குகேஷ் 7.5 புள்ளிகளுடன் புள்ளிகள் பட்டியலில் 3-வது இடத்தில் உள்ளார். ஆனால் முதல் இரு இடங்களில் உள்ள வீரர்களும் 7.5 புள்ளிகளுடன் இருப்பதால், மூவரும் சமநிலையில் உள்ளனர்.
பிரக்ஞானந்தா மற்றும் விதித் குஜராத்தி ஆகியோர் முறையே 6 மற்றும் 5 புள்ளிகளுடன் புள்ளிகள் பட்டியலில் 5 மற்றும் 6-வது இடத்தில் உள்ளனர்.
ஒவ்வொரு வீரரும் மற்ற வீரர்களுடன் தலா இரண்டு முறை மோத வேண்டும். மொத்தம் 14 சுற்றுகள் நடைபெறும். இப்போட்டியின் முடிவில் முதலிடம் பிடிப்பவர்கள் 2024-ம் ஆண்டுக்கான உலக செஸ் சாம்பியன்ஷிப் போட்டியில் விளையாடுவார்கள்.
இந்நிலையில் 12 சுற்றுகள் முடிந்த நிலையில் இந்தியாவைச் சேர்ந்த டி.குகேஷ் நல்ல நிலைமையில் உள்ளார். அவர் முதலிடம் பெற்று சாதனை படைப்பாரா என்கிற எதிர்பார்ப்பு ரசிகர்கள் மத்தியில் அதிகமாக உள்ளது.
