ஆசிய கிரிக்கெட் கவுன்சில் தலைவர் மோசின் நக்வி, ஆசியக் கோப்பையை துபால் அலுவலகத்தில் பூட்டி வைத்துள்ளதாகத் தகவல் வெளியாகியுள்ளது.
ஆசியக் கோப்பை இறுதிச் சுற்றில் இந்தியா, பாகிஸ்தான் அணிகள் செப்டம்பர் 28 அன்று துபாயில் மோதின. இதில் இந்திய அணி 5 விக்கெட்டுகள் வித்தியாசத்தில் வெற்றி பெற்று ஆசியக் கோப்பையை வென்றது.
இருந்தபோதிலும், ஆசியக் கிரிக்கெட் கவுன்சில் தலைவர் மோசின் நக்வியிடமிருந்து கோப்பையைப் பெற இந்திய அணி விருப்பம் தெரிவிக்கவில்லை. இதன் காரணமாக, ஆசியக் கோப்பை இறுதிச் சுற்றில் இந்திய அணி வெற்றி பெற்றபோதிலும், இந்திய அணியிடம் கோப்பை ஒப்படைக்கப்படவில்லை. கோப்பை இல்லாமலே கோப்பையைப் பெறுவது போல இந்திய வீரர்கள் கொண்டாடினார்கள்.
ஆசியக் கோப்பையை இந்திய அணியிடம் வழங்காதது குறித்து ஐசிசியிடம் புகாரளிக்கவுள்ளதாக பிசிசிஐ தெரிவித்தது.
ஆசியக் கோப்பையில் இந்தியாவும் பாகிஸ்தானும் மூன்று முறை நேருக்கு நேர் மோதின. மூன்று முறையும் இரு நாட்டு வீரர்களும் கைக்குலுக்கிக் கொள்ளவில்லை. இதனால், ஆசியக் கோப்பை முழுக்க பரபரப்பாகவே இருந்தது.
மோசின் நக்வி ஆசிய கிரிக்கெட் கவுன்சில் தலைவராக மட்டுமில்லாமல், பாகிஸ்தான் கிரிக்கெட் வாரியத் தலைவர் மற்றும் அந்நாட்டில் அமைச்சராகவும் இருப்பதால் இந்திய அணி அவரிடமிருந்து கோப்பையைப் பெற மறுத்தார்கள். ஆசியக் கோப்பையை மோசின் நக்வியே எடுத்துச் சென்றதாகவும் புகார்கள் கூறப்பட்டன. இந்நிலையில், ஆசியக் கோப்பையை மோசின் நக்வி துபாய் அலுவலகத்தில் பூட்டி வைத்துள்ளதாகத் தகவல் வெளியாகியுள்ளது.
மோசின் நக்விக்கு நெருக்கமான வட்டாரங்கள் பிடிஐ செய்தி நிறுவனத்திடம் கூறியதாவது:
"தற்போதைய நிலையில், ஆசியக் கோப்பை துபாயிலுள்ள ஆசிய கிரிக்கெட் கவுன்சில் அலுவலகத்தில் தான் உள்ளது. தன்னுடைய அனுமதி இல்லாமல் கோப்பையை யாரும் தொடக் கூடாது, யாரிடமும் வழங்கக் கூடாது என அவர் தெளிவாக அறிவுறுத்தியுள்ளார்.
இந்திய அணியிடம் அல்லது பிசிசிஐயிடம் தானே கோப்பையை நேராகக் கொடுப்பேன் என்றும் அவர் கூறியுள்ளார்" என்று மோசின் நக்விக்கு நெருக்கமான வட்டாரம் தெரிவித்துள்ளது.
ஆசியக் கோப்பை முடிந்தபோதிலும், இந்தியா - பாகிஸ்தான் பிரச்னை இன்னும் ஓய்ந்தபாடில்லை. அடுத்து ஐசிசி போட்டிகளில் இந்தியா, பாகிஸ்தான் விளையாடினால் என்ன நேரும் என்பது இதிலிருந்தே நன்றாகத் தெரிகிறது.
Asia Cup T20 | Asia Cup | Asia Cup 2025 | India v Pakistan | Ind v Pak | ACC | Asian Cricket Council | Mohsin Naqvi |
