இந்தியா, வங்கதேசம் இடையிலான இரு ஆட்டங்கள் கொண்ட டெஸ்ட் தொடர் நாளை (செப்டம்பர் 19) தொடங்குகிறது. முதல் டெஸ்ட் சென்னையிலும், இரண்டாவது டெஸ்ட் செப்டம்பர் 27-ல் கான்பூரிலும் நடைபெறவுள்ளது.
இந்நிலையில் ஐசிசி டெஸ்ட் தரவரிசையில் நெ.1 இடத்தில் இருக்கும் இந்தியச் சுழற்பந்து வீச்சாளர் அஸ்வினுக்கு இத்தொடரில் 5 சாதனைகளை முறியடிக்கும் வாய்ப்புள்ளது.
அதன் விவரங்கள்
* சொந்த மண்ணில் அதிக விக்கெட்டுகள்
இன்னும் 22 விக்கெட்டுகள் எடுத்தால் சொந்த மண்ணில் அதிக விக்கெட்டுகளை வீழ்த்திய இந்தியப் பந்துவீச்சாளர் எனும் சாதனையைப் படைப்பார் அஸ்வின். இந்தப் பட்டியலில் அனில் கும்ப்ளே 476 விக்கெட்டுகளுடன் முதலிடத்தில் உள்ளார்.
* வங்கதேசத்துக்கு எதிராக அதிக விக்கெட்டுகள்
வங்கதேசத்துக்கு எதிராக இதுவரை 6 டெஸ்டில் விளையாடி 23 விக்கெட்டுகளை வீழ்த்தியுள்ளார் அஸ்வின். இந்தப் பட்டியலில் ஜாகீர் கான் 31 விக்கெட்டுகளுடன் முதலிடத்தில் உள்ளார். எனவே இத்தொடரில் 9 விக்கெட்டுகளை எடுக்கும் பட்சத்தில் இந்தச் சாதனையை முறியடிப்பார் அஸ்வின்.
* உலக டெஸ்ட் சாம்பியன்ஷிப் வரலாற்றில் இதுவரை 10 முறை ஒரு இன்னிங்ஸில் 5 அல்லது அதற்கும் மேற்பட்ட விக்கெட்டுகளை வீழ்த்தியுள்ளார் அஸ்வின். இந்தப் பட்டியலில் அஸ்வினுடன் இணைந்து ஆஸ்திரேலியாவின் நேதன் லயனும் முதலிடத்தில் உள்ளார். எனவே வரவிருக்கும் தொடரில் ஒரு முறை ஒரு இன்னிங்ஸில் 5 அல்லது அதற்கும் மேற்பட்ட விக்கெட்டுகளை வீழ்த்தும் பட்சத்தில் அஸ்வின் இந்தப் பட்டியலில் முதலிடத்துக்கு முன்னேறுவார்.
* உலக டெஸ்ட் சாம்பியன்ஷிப் வரலாற்றில் அதிக விக்கெட்டுகள்
இந்தப் பட்டியலில் நேதன் லயன் 187 விக்கெட்டுகளை வீழ்த்தி முதலிடத்தில் உள்ளார். இதனை முறியடிக்க அஸ்வினுக்கு இன்னும்14 விக்கெட்டுகள் தேவைப்படுகிறது.
* 2023-25 பருவத்துக்கான டெஸ்ட் சாம்பியன்ஷிப் போட்டியில் அதிக விக்கெட்டுகள்
இந்தப் பட்டியலில் ஆஸ்திரேலியாவின் ஹேசில்வுட் 51 விக்கெட்டுகளை வீழ்த்தி முதலிடத்தில் உள்ளார். இதனை முறியடிக்க அஸ்வினுக்கு இன்னும் 10 விக்கெட்டுகள் தேவைப்படுகிறது.
