வெற்றி மாறன் இயக்கத்தில் சிலம்பரசன் நடிக்கும் அடுத்த படத்திற்கு ‘அரசன்’ எனப் பெயரிடப்பட்டுள்ளது.
பொல்லாதவன், ஆடுகளம், அசுரன், விசாரணை, வடசென்னை போன்ற படங்களால் தமிழ் சினிமாவில் தனி இடம் பிடித்திருப்பவர் இயக்குநர் வெற்றிமாறன். அவரது அடுத்த படத்தில் சிலம்பரசன் கைகோக்கிறார்.
மணிரத்னம் இயக்கத்தில் தக் லைஃப் படத்திற்குப் பிறகு வெற்றி மாறனுடன் இணைகிறார் சிலம்பரசன். வெற்றி மாறன் விடுதலை பாகம் 2-க்குப் பிறகு இப்படத்தை இயக்குகிறார்.
இந்நிலையில், சிம்பு - வெற்றி மாறன் இணையும் படத்துக்கு அரசன் எனப் பெயரிடப்பட்டுள்ளது. இப்படத்தின் போஸ்டரைப் படத் தயாரிப்பாளர் தாணு இன்று வெளியிட்டார். சிலம்பரசனின் 49-வது படம் இது. தனுஷ் நடித்து பெரும் வரவேற்பைப் பெற்ற ‘வட சென்னை’ படத்தின் கதைக் களத்திலேயே இப்படம் அமையும் என்று கூறப்படுகிறது. படத்தின் போஸ்டரிலும் வட சென்னை படத்தின் சாயலிலேயே அரசன் என்ற பெயர் இடம்பெற்றுள்ளது.
இதற்கிடையே படத்தில் முக்கியக் கதாபாத்திரங்களில் கிஷோர், ஆண்ட்ரியா, இயக்குநர் நெல்சன் திலீப் குமார் ஆகியோர் நடிப்பதாகவும், கதாநாயகியாக சாய் பல்லவி நடிக்க வாய்ப்பு இருப்பதாகவும் கூறப்படுகிறது. வெற்றி மாறனின் பெரும்பாலான படங்களுக்கு இசையமைத்த ஜி.வி.பிரகாஷ், இப்படத்திற்கும் இசையமைக்க வாய்ப்புள்ளதாகவும் சொல்லப்படுகிறது.
