வெற்றி மாறன் இயக்கத்தில் சிலம்பரசன் நடிக்கும் அடுத்த படத்திற்கு ‘அரசன்’ எனப் பெயரிடப்பட்டுள்ளது.
பொல்லாதவன், ஆடுகளம், அசுரன், விசாரணை, வடசென்னை போன்ற படங்களால் தமிழ் சினிமாவில் தனி இடம் பிடித்திருப்பவர் இயக்குநர் வெற்றிமாறன். அவரது அடுத்த படத்தில் சிலம்பரசன் கைகோக்கிறார்.
மணிரத்னம் இயக்கத்தில் தக் லைஃப் படத்திற்குப் பிறகு வெற்றி மாறனுடன் இணைகிறார் சிலம்பரசன். வெற்றி மாறன் விடுதலை பாகம் 2-க்குப் பிறகு இப்படத்தை இயக்குகிறார். முன்னதாக சூர்யா நடிப்பில் அவர் வாடிவாசல் படத்தை இயக்குவதாக அறிவிப்பு வெளியாகி, பின் பல காரணங்களால் அப்படம் கைவிடப்பட்டது. அதன் பின்னர் சிம்புவுடன் அடுத்த படத்தில் இணையப் போவதாகச் சமீபத்தில் தகவல்கள் வெளியாகின.
அதை உறுதி செய்த இயக்குநர் வெற்றி மாறன், அக்டோபர் 4 அன்று படத்தின் ப்ரோமோ வெளியாகும் என்று சமூக ஊடகப் பதிவு ஒன்றை வெளியிட்டிருந்தார்.
இந்நிலையில், படத்தின் பெயரை தயாரிப்பாளரான கலைப்புலி தாணு வெளியிட்டார்.
‘அரசன்’ எனப் பெயிரப்பட்டுள்ள போஸ்டரை வெளியிட்ட கலைப்புலி தாணு, “ஆளப்பிறந்தவன் அரசன்... வெற்றியுடன் சிலம்பரசன்” என்ற பதிவுடன் வெளியிட்டுள்ளார். சிலம்பரசனின் 49-வது படமாக இது அமைகிறது. தனுஷ் நடித்து பெரும் வரவேற்பைப் பெற்ற ‘வட சென்னை’ படத்தின் கதைக் களத்திலேயே இப்படம் அமையும் என்று கூறப்படுகிறது. படத்தின் போஸ்டரிலும் வட சென்னை படத்தின் சாயலிலேயே அரசன் என்ற பெயர் இடம்பெற்றுள்ளது.
இதற்கிடையே படத்தில் முக்கிய பாத்திரத்தில் கிஷோர், ஆண்ட்ரியா, இயக்குநர் நெல்சன் திலீப் குமார் ஆகியோர் நடிப்பதாகவும், கதாநாயகியாக சாய் பல்லவி நடிக்க வாய்ப்பு இருப்பதாகவும் கூறப்படுகிறது. வெற்றிமாறன் படங்களுக்கு இசையமைத்து வரும் ஜி.வி.பிரகாஷ், இப்படத்திற்கும் இசையமைக்க வாய்ப்புள்ளதாகவும் சொல்லப்படுகிறது.
