சித்தார்த், அதிதி திருமணம் தெலங்கானா மாநிலம் வனபர்த்தியில் நடைபெற்றது.
பாய்ஸ் படம் மூலம் அறிமுகமாகி இந்தியன்-2 வரை பல்வேறு படங்களில் நடித்து பிரபலமானவர் சித்தார்த். மணிரத்னமிடம் உதவி இயக்குநராகவும் இருந்துள்ளார்.
மணிரத்னம் இயக்கத்தில் காற்று வெளியிடை படம் மூலம் தமிழில் பிரபலமாக அறியப்பட்டார் அதிதி. பத்மாவத், சூஃபியும் சுஜாதாயும் போன்ற முக்கியப் படங்களில் அதிதி நடித்துள்ளார்.
சித்தார்த் மற்றும் அதிதி இணைந்து 2021-ல் வெளியான மஹா சமுத்திரம் படத்தில் ஒன்றாக நடித்துள்ளார்கள். இந்தப் படம் தமிழ் மற்றும் தெலுங்கு மொழிகளில் வெளியானது. இந்தப் படத்திலிருந்து இருவரும் காதலித்து வருவதாகத் தெரிகிறது.
இருவருக்கும் கடந்த மார்ச் மாதம் இதே வனபர்த்தியிலுள்ள ரங்கநாத சுவாமி கோயிலில் திருமண நிச்சயதார்த்தம் நடைபெற்றது. இதே கோயிலில் இருவருடைய திருமணமும் நடைபெற்றுள்ளது. மிக நெருங்கிய உறவினர்களுக்கு மட்டும் அழைப்பு விடுக்கப்பட்டு திருமண நிகழ்ச்சி நடைபெற்றுள்ளது.
திருமண புகைப்படங்களை சித்தார்த் மற்றும் அதிதி தங்களுடைய இன்ஸ்டாகிராம் பக்கத்தில் பதிவிட்டுள்ளார்கள். இந்தப் பதிவின் கீழ் துல்கர் சல்மான், அனா பென், ராஷி கன்னா, குஷ்பு, ஷோபிதா, பிரீத்தி அஷ்வின், அதியா ஷெட்டி, வேதிகா, மனிஷா கொய்ராலா, சம்யுக்தா ஹெக்டே, ஹன்சிகா உள்ளிட்டோர் வாழ்த்து தெரிவித்துள்ளார்கள்.
