கமல் ஹாசன் தயாரிப்பில் ரஜினிகாந்த் நடிக்கும் படத்தின் இயக்குநர் பற்றிய அறிவிப்பைப் படக்குழு வெளியிட்டுள்ளது.
கமல் ஹாசனின் ராஜ் கமல் ஃபிலிம்ஸ் நிறுவனத்தின் தயாரிப்பில் ரஜினிகாந்த் நடிக்கும் படம் ‘தலைவர் 173’ என்று தற்காலிகமாகப் பெயரிடப்பட்டது. இது குறித்த அறிவிப்பு கடந்த ஆண்டு நவம்பர் 5 அன்று வெளியானது. அதன்படி இப்படத்தை இயக்குநர் சுந்தர் சி இயக்கவுள்ளதாகவும், இது 2027 பொங்கலுக்கு வெளியாகும் என்றும் அப்போது தெரிவிக்கப்பட்டது.
சுந்தர் சி விலகல்
ஆனால், சில நாள்களுக்குப் பின் சுந்தர் சி இப்படத்தில் இருந்து திடீரென்று விலகினார். “கனத்த இதயத்துடன் முக்கியமான செய்தியைத் தங்களுடன் பகிர்கிறேன். சில தவிர்க்க முடியாத காரணங்களால், மதிப்புமிக்க தலைவர்173 (தற்காலிகமாகப் பெயர் சூட்டப்பட்டிருந்த ரஜினி படம்) படத்திலிருந்து விலகும் கடினமான முடிவை எடுத்துள்ளேன்” என்று தனது அறிக்கையில் குறிப்பிட்டிருந்தார். இதனால் கமல் இயக்கி ரஜினி நடிக்கும் படத்திற்கு இயக்குநரைத் தேடும் படலம் தொடங்கியது.
தலைவர் 173-ல் புதியவர்களுக்கு வாய்ப்பு
இதற்கிடையில், நவம்பர் 15 அன்று மதுரை விமான நிலையத்தில் செய்தியாளர்களைச் சந்தித்த கமல் ஹாசன், “ரஜினிக்குப் பிடித்த கதையைக் கேட்டுக் கொண்டிருக்கிறோம். கதை நன்றாக இருந்தால் புதியவர்களுக்கும் வாய்ப்பிருக்கிறது. நானும் ரஜினியும் இணைந்து நடிக்க இன்னொரு கதையையும் தேடிக் கொண்டிருக்கிறோம்” என்று குறிப்பிட்டிருந்தார்.
தலைவர் 173 இயக்குநர் யார்?
இந்நிலையில், தற்போது தலைவர் 173-ன் இயக்குநர் யார் என்ற தகவலைத் தயாரிப்பு நிறுவனம் அதிகாரப்பூர்வமாக வெளியிட்டுள்ளது. கடந்த 2022-ல் சிவகார்த்திகேயன் நடித்து வெளியான டான் படத்தை இயக்கிய சிபி சக்ரவர்த்திதான் ரஜினியின் அடுத்த படத்தை இயக்குகிறார். இப்படத்திற்கு அனிருத் இசையமைக்கிறார். இவ்விரண்டு தகவல்களையும் உள்ளடக்கிய போஸ்டர் ஒன்றைப் படக்குழு வெளியிட்டுள்ளது. ரஜினியின் ஜெயிலர் 2 படத்துக்கும் அனிருத் தான் இசையமைத்து வருகிறார். இந்தப் படத்தில் கமல்ஹாசனும் முக்கிய கதாபாத்திரத்தில் நடிக்கவிருப்பதாகவும் கூறப்படுகிறது.
Raaj Kamal Films International has announced the director of the film starring Rajinikanth and produced by Kamal Haasan.
