அமரன் படத்தின் ஓடிடி வெளியீட்டுத் தேதி அறிவிக்கப்பட்டுள்ளது.
ராஜ்குமார் பெரியசாமி இயக்கத்தில் சிவகார்த்திகேயன், சாய் பல்லவி உள்பட பலர் நடித்த அமரன் படம் கடந்த தீபாவளியன்று வெளியாகி, ரசிகர்களின் அமோக வரவேற்பைப் பெற்றது.
இந்திய நாட்டுக்காக வீர மரணம் அடைந்த தமிழகத்தைச் சேர்ந்த மேஜர் முகுந்த் வரதராஜனின் வாழ்க்கை வரலாறைத் தழுவி எடுக்கப்பட்ட இப்படத்தில், சிவகார்த்திகேயன் ராணுவ வீரராக நடித்தார்.
இப்படம் நல்ல வரவேற்பை பெற்று வந்த நிலையில், திரையரங்குகளில் வெளியான 8 வாரங்களுக்குப் பிறகே ஓடிடியில் வெளியிட வேண்டும் என்று தமிழ்நாடு திரையரங்கு உரிமையாளர்கள் சங்கம் ராஜ்கமல் தயாரிப்பு நிறுவனம், ரெட் ஜெயண்ட் நிறுவனம் மற்றும் சிவகார்த்திகேயனிடம் கோரிக்கை வைத்தது.
இந்நிலையில் அமரன் படம் வெளியாகி 5 வாரங்கள் ஆன நிலையில், அதன் ஓடிடி வெளியீட்டுத் தேதி அறிவிக்கப்பட்டுள்ளது.
இப்படம் டிசம்பர் 5-ல் நெட்ஃபிளிக்ஸ் ஓடிடி தளத்தில் வெளியாகும் என அறிவிக்கப்பட்டுள்ளது.