சென்னை சர்வதேச திரைப்பட விழாவில் நடிகர் சசிகுமாருக்கு சிறந்த நடிகருக்கான விருது வழங்கி கௌரவிக்கப்பட்டது.
இந்திய திரைப்பட வளர்ச்சிக் கழகத்துடன் தமிழ்நாடு அரசு இணைந்து நடத்தும் சென்னை சர்வதேச திரைப்பட விழா ஆண்டுதோறும் டிசம்பரில் நடைபெறுவது வழக்கம். இதில் உலகின் பல்வேறு மொழிகளில் வெளியான சிறந்த படங்கள், திரை ஆர்வலர்களுக்காக திரையிடப்பட்டு, அவை குறித்த விவாதங்கள் நடைபெறும்.
அந்த வகையில், 23-வது சென்னை சர்வதேச திரைப்பட விழா, கடந்த டிசம்பர் 11 அன்று தொடங்கியது. சென்னை பிவிஆர் சினிமாஸில் நடைபெற்று வரும் இந்த விழா இன்று நிறைவடைகிறது. இவ்வாண்டு விழாவில் ஜெர்மன், ரஷ்யா, ஸ்பெயின், பிரெஞ்ச், தாய்வான் என 51 நாடுகளை சேர்ந்த 122 படங்கள் திரையிடப்பட்டன. மேலும், தமிழில் அலங்கு, பிடிமண், மாமன், மருதம், பறந்து போ, வேம்பு, டூரிஸ்டு பேமிலி, பாட்ஷா, 3 பிஹெச்கே ஆகிய படங்கள் திரையிடப்பட்டன.
இதில் நேற்று (டிச. 18) நடந்த விழாவில் அபிஷன் ஜீவிந் இயக்கிய டூரிஸ்டு பேமிலி படத்தில் நடித்ததற்காக சிறந்த நடிகருக்கான விருது நடிகர் சசிகுமாருக்கு வழங்கப்பட்டது. ஜெயப்பிரகாஷ் இயக்கிய காதல் என்பது பொதுவுடைமை படத்திற்காக சிறந்த நடிகைக்கான விருது லிஜோமோல் ஷோஷுக்கு வழங்கப்பட்டது. சிறந்த தமிழ்ப்படத்திற்கான விருதுகள், இயக்குநர் ராமின் பறந்து போ மற்றும் டூரிஸ்ட் பேமிலி படங்களுக்கு வழங்கப்பட்டது. சிறப்பு ஜூரி விருது மெட்ராஸ் மேட்னி படத்திற்காக நடிகர் காளி வெங்கட்டுக்கும், வேம்பு படத்திற்காக ஷீலா ராஜ்குமாருக்கும் வழங்கப்பட்டது. சிறந்த ஒளிப்பதிவாளருக்கான விருது அலங்கு படத்திற்காக எஸ். பாண்டிகுமாருக்கு வழங்கப்பட்டது. சிறந்த படத்தொகுப்புக்கான விருது, மாயக்கூத்து படத்திற்காக நாகூர் ராமச்சந்திரனுக்கு வழங்கப்பட்டது.
இதையடுத்து தனது சமூக ஊடகப் பக்கத்தில் விருதுடன் படங்களைப் பகிர்ந்து நடிகர் சசிகுமார் நெகிழ்ச்சியைப் பதிவு செய்துள்ளார்.
Actor Sasikumar was honored with the Best Actor Award at the Chennai International Film Festival for Tourist Family movie
