டெஸ்டில் ஒரு இன்னிங்ஸில் அதிக சிக்ஸர்கள் அடித்த வாசிம் அக்ரமின் சாதனையைச் சமன் செய்தார் ஜெயிஸ்வால்.
இந்தியா - இங்கிலாந்து இடையிலான மூன்றாவது டெஸ்ட் ராஜ்கோட்டில் நடைபெற்று வருகிறது. 2-வது இன்னிங்ஸில் 4 விக்கெட் இழப்புக்கு 430 ரன்கள் குவித்து டிக்ளேர் செய்தது இந்திய அணி. இதனால் இங்கிலாந்து அணிக்கு 557 ரன்கள் இலக்காக நிர்ணயிக்கப்பட்டது. ஜெயிஸ்வால் 214 ரன்கள் எடுத்து கடைசி வரை ஆட்டமிழக்காமல் இருந்தார். இதன் மூலம் டெஸ்டில், இளம் வயதில் 2 இரட்டைச் சதங்கள் அடித்த 3-வது வீரர் எனும் பெருமையைப் பெற்றார் ஜெயிஸ்வால். மேலும் டெஸ்டில் ஒரு இன்னிங்ஸில் அதிக சிக்ஸர்கள் (12) அடித்த வாசிம் அக்ரமின் சாதனையையும் சமன் செய்தார் ஜெயிஸ்வால்.
டெஸ்டில், இளம் வயதில் 2 இரட்டைச் சதங்கள்
21 வருடங்கள் 54 நாள்கள் - காம்ப்ளி
21 வருடங்கள் 318 நாள்கள் - பிராட்மேன்
22 வருடங்கள் 49 நாள்கள் - ஜெயிஸ்வால்
மேலும், ஜெயிஸ்வால் ஒரு டெஸ்ட் இன்னிங்ஸில் அதிக சிக்ஸர் அடித்த இந்திய வீரர் மற்றும் ஒரே டெஸ்ட் தொடரில் தொடர்ந்து 2-வது இரட்டைச் சதத்தை அடித்த 3-வது இந்திய வீரர் எனும் சாதனையையும் படைத்தார்.