ஜாஃபர் சாதிக் வழக்கில் அமீர் மீது குற்றப்பத்திரிகை தாக்கல்!

சட்டவிரோத பணப்பரிமாற்ற தடைச் சட்ட வழக்கில் ஜாஃபர் சாதிக், அமீர் உள்பட 12 பேருக்கு எதிராக அமலாக்கத்துறை, குற்றப்பத்திரிகை தாக்கல் செய்துள்ளது.

கடந்த மார்ச் 9-ல் திமுகவைச் சேர்ந்த ஜாஃபர் சாதிக் போதைப் பொருள் கடத்தல் வழக்கில் மத்திய போதைப் பொருள் தடுப்புப் பிரிவினரால் கைது செய்யப்பட்டு சிறையில் அடைக்கப்பட்டார்.

இதை அடுத்து சட்டவிரோத பணப்பரிமாற்ற தடை சட்டத்தின் கீழ் ஜாபர் சாதிக்கைக் கைது செய்தது அமலாக்கத்துறை. இதனைத் தொடர்ந்து போதைப் பொருள் கடத்தல் வழக்கில் ஜாபர் சாதிக்கிற்கு ஜாமின் வழங்கியது தில்லி உயர் நீதிமன்றம். ஆனால் அமலாக்கத்துறை வழக்கு நிலுவையில் இருந்ததால் சிறையில் இருந்து ஜாபர் சாதிக் வெளிவருவதில் சிக்கல் ஏற்பட்டது.

ஜாபர் சாதிக் மேற்கொண்ட குற்றச்செயல்களில் அவரது குடும்பத்தினருக்கும் பங்கு இருக்கும் என்று கருதிய அமலாக்கத்துறை அவர்களிடம் விசாரணை மேற்கொண்டது. இந்நிலையில் சட்டவிரோத பணப்பரிமாற்ற தடை சட்டத்தின் கீழ் ஜாபர் சாதிக்கின் சகோதரர் முகமது சலீமையும் அமலாக்கத்துறை கைது செய்தது.

இந்நிலையில் இந்த வழக்கு தொடர்பாக, அமலாக்கத் துறை, சென்னை முதன்மை அமர்வு நீதிமன்றத்தில் குற்றப்பத்திரிகை தாக்கல் செய்துள்ளது.

302 பக்கங்கள் கொண்ட இந்த குற்றப்பத்திரிகையில் ஜாஃபர் சாதிக், அமீர், அமீரின் மனைவி உள்பட 12 நபர்களின் பேரும், ஜாஃபர் சாதிக்கின் தயாரிப்பு நிறுவனம் உள்பட 8 நிறுவனங்களும் சேர்க்கப்பட்டுள்ளன. 12-வது நபராக சேர்க்கப்பட்டுள்ள அமீர், சட்ட விரோதமான பணத்தை கையாண்டுள்ளதாக குற்றப்பத்திரிகையில் குறிப்பிடப்பட்டுள்ளது.