உபெர் செயலி மூலம் சென்னை மெட்ரோ ரயில் டிக்கெட்டை பெறும் வசதி புதிதாக அறிமுகம் செய்யப்பட்டுள்ளது.
இதன் அறிமுகச் சலுகையாக ஆகஸ்ட் மாதம் முழுவதும் உபெர் செயலியைப் பயன்படுத்தி மெட்ரோ டிக்கெட்டை பெற்றால் 50% தள்ளுபடியைப் பெறலாம் என சென்னை மெட்ரோ ரயில் நிர்வாகம் அறிவித்துள்ளது.
இதுதொடர்பாக சென்னை மெட்ரோ ரயில் நிர்வாகம் சார்பில் தெரிவிக்கப்பட்டுள்ளதாவது:
"சென்னை மெட்ரோ இரயில் நிறுவனம் மெட்ரோ பயணச்சீட்டுகளை தற்போது உபெர் செயலி மூலம் எளிதாகப் பெறும் சேவையை அறிமுகப்படுத்தியுள்ளது
சென்னை மெட்ரோ இரயில் நிறுவனம், உபெர் மற்றும் ஓஎன்டிசி (ONDC) நெட்வொர்க் உடன் இணைந்து, உபெர் செயலி மூலம் மெட்ரோ இரயில் பயணத்திற்கானப் பயணச்சீட்டைப் பெறும் வசதியை, சென்னை மெட்ரோ இரயில் நிறுவனத்தின் தலைமை அலுவலகம் மெட்ரோஸில் இன்று (07.08.2025) சென்னை மெட்ரோ இரயில் நிறுவனத்தின் மேலாண்மை இயக்குநர் மு.அ. சித்திக் அறிமுகப்படுத்தினார்.
இன்று முதல், சென்னையில் உள்ள உபெர் பயனாளர்கள், தங்களது மெட்ரோ பயணங்களைத் திட்டமிடவும், க்யூஆர் அடிப்படையிலான பயணச்சீட்டுகளைப் பெறவும், நேரடி மெட்ரோ பயணத் தகவல்களையும் உபெர் செயலியில் தெரிந்துகொள்ளலாம்.
இதன் அறிமுகச் சலுகையாக 2025-ல் ஆகஸ்ட் மாதம் முழுவதும் உபெர் செயலியைப் பயன்படுத்தி மெட்ரோ பயணச்சீட்டுகளை வாங்கும் பயணிகள் பயணச்சீட்டுகளில் 50% தள்ளுபடியைப் பெறலாம். இந்தச் சலுகை உபெர் செயலியில் மட்டுமே கிடைக்கும்.
இது சென்னை மெட்ரோ இரயில் நிறுவனம் வழங்கும் பிற மெட்ரோ பயணச்சீட்டு சேவை தளங்களில் பொருந்தாது. உபெர் செயலியைப் பயன்படுத்தி மெட்ரோ பயணச்சீட்டு பெறுவதற்கு யுபிஐ முறையே பயன்படுத்தப்படும். இது டிஜிட்டல் பயன்பாட்டை மேம்படுத்துகிறது.
இந்நிகழ்ச்சியில், சென்னை மெட்ரோ இரயில் நிறுவனத்தின் இயக்குநர் மனோஜ் கோயல் (அமைப்புகள் மற்றும் இயக்கம்), தலைமை ஆலோசகர் கோபிநாத் மல்லையா, (இயக்கம் மற்றும்பராமரிப்பு), ஆலோசகர் கே.ஏ.மனோகரன் (தானியங்கி கட்டண வசூல் அமைப்பு மற்றும் தொழில்நுட்பம்), உபெர் நிறுவனத்தின் உயர் இயக்குநர் மணிகண்டன் தங்கரத்தினம், ஓஎன்டிசி நிறுவனத்தின் உயர் துணைத் தலைவர் நிதின் நாயர், சென்னை மெட்ரோ இரயில் நிறுவனம் மற்றும் உபெர் நிறுவனத்தின் உயர் அலுவலர்கள் மற்றும் பணியாளர்கள் உடனிருந்தனர்.
சென்னை மெட்ரோ இரயில் நிறுவனம், டிஜிட்டல் எஸ்விபி, க்யூஆர் குறியீடு பயணச்சீட்டு, வாட்ஸ்ஆப் - (+91 83000 86000), பேடிஎம் செயலி, ஃபோன்பே மற்றும் சிங்காரச் சென்னை அட்டை போன்ற பயணச்சீட்டுகளைப் பயன்படுத்தி மெட்ரோ இரயில்களில் பயணிப்பவர்களுக்கு 20% கட்டணத் தள்ளுபடியை வழங்குகிறது" என்று தெரிவிக்கப்பட்டுள்ளது.
Chennai Metro | Chennai Metro Rail | Uber App | Uber | Chennai Metro Ticket |