கரூர் கூட்டநெரிசல் சம்பவத்தில் உயிரிழந்தவர்கள் குடும்பத்தினருக்கு அறிவித்த ரூ. 20 லட்சம் நிவாரணத்தை வங்கி மூலம் அனுப்பியுள்ளதாக தவெக தலைவர் விஜய் தெரிவித்துள்ளார்.
தமிழக வெற்றிக் கழகத் தலைவர் விஜய் கடந்த செப்டம்பர் 27 அன்று நாமக்கல் மற்றும் கரூரில் மக்களைச் சந்திக்கும் பிரசாரக் கூட்டத்தை மேற்கொண்டார். கரூர் பிரசாரக் கூட்டத்தில் கூட்டநெரிசல் ஏற்பட்டு 41 பேர் உயிரிழந்தார்கள்.
கூட்டநெரிசல் சம்பவத்தில் உயிரிழந்தவர்கள் குடும்பத்தினருக்கு தலா ரூ. 20 லட்சம் நிவாரணம் வழங்கப்பட வேண்டும் என தவெக சார்பில் செப்டம்பர் 28 அன்று அதிகாரபூர்வமாக அறிவிக்கப்பட்டது.
உயிரிழந்தவர்களின் குடும்பத்தினரை நேரில் சந்திப்பதற்காக விஜய் கரூர் செல்வார் என எதிர்பார்க்கப்பட்டது. அதற்கு முன்னதாக அவர்களிடம் காணொளி மூலம் விஜய் பேசினார். இதனிடையே, கரூர் செல்வதற்கான அனுமதியைப் பெறுவதற்கானப் பணிகள் தமிழக வெற்றிக் கழகம் சார்பில் மேற்கொள்ளப்பட்டு வருகிறது.
இந்நிலையில், உயிரிழந்தவர்கள் குடும்பத்துக்கு தவெக சார்பில் அறிவிக்கப்பட்ட ரூ. 20 லட்சம் வங்கி மூலம் அனுப்பிவைக்கப்பட்டுள்ளதாக அறிவிப்பு வெளியாகியுள்ளது.
இதுதொடர்பாக வெளியாகியுள்ள அறிக்கையில் தெரிவிக்கப்பட்டுள்ளதாவது:
"கரூரில் ஏற்பட்ட தாங்க முடியாத வேதனையான நிகழ்வில் நம் குடும்ப உறவுகளை இழந்து தவிக்கிறோம். இந்தச் சூழலில் உங்களுக்கு ஆறுதலாகவும் ஆதரவாகவும் எல்லா வகையிலும் இருப்போம் என்பதை மீண்டும் உறுதிபடத் தெரிவித்துக் கொள்கிறோம்.
சென்ற வாரம் உங்களுடனான நம் துக்கத்தைப் பகிர்ந்துகொள்ள மேற்கொண்ட காணொளி அழைப்பில் நாம் சொன்னது போலவே, நமது சந்திப்பிற்காக, அதற்கான சட்டரீதியான அனுமதி முன்னெடுப்புகளை எடுத்து வருகிறோம். அனுமதி கிடைத்ததும் நிச்சயமாகச் சந்திப்போம்.
இதனிடையே, நாம் ஏற்கெனவே (செப்டம்பர் 28 அன்று) அறிவித்தபடி குடும்ப நல நிதியாக ரூ. 20 லட்சத்தை வங்கியின் ஆர்டிஜிஎஸ் (RTGS) வழியாகத் தமிழக வெற்றிக் கழகத்தின் சார்பாக (அக்டோபர் 18) அனுப்பி வைத்துள்ளோம். அதை நமது உதவிக் கரமாக ஏற்குமாறு அன்புடன் கேட்டுக்கொள்கிறோம்.
இறைவன் அருளுடன் இந்தக் கடினமான தருணத்தைக் கடந்து வருவோம்" என்று விஜய் தெரிவித்துள்ளார்.
TVK Vijay | Karur Stampede | Vijay |