டிட்வா புயல் ஞாயிறு மாலை ஆழ்ந்த காற்றழுத்தத் தாழ்வு மண்டலமாகச் சென்னையை நெருங்கும் என்று சுயாதீன வானிலை ஆய்வாளர் பிரதீப் ஜான் தெரிவித்துள்ளார்.
வங்கக் கடலில் உருவாகியுள்ள டிட்வா புயல் இலங்கையில் மிகக் கனமழையைத் தந்துள்ளது. இதன் காரணமாக இலங்கை முழுக்க பெரும் பாதிப்புகளைச் சந்தித்துள்ளன. இந்தப் புயலானது படிப்படியாக தமிழகத்தை நோக்கி நகர்ந்துள்ளது. தமிழகக் கடலோரப் பகுதிகளை ஒட்டியே இந்தப் புயலின் நகர்வு இருக்கும் என முன்பே கணிக்கப்பட்டிருந்தது. இந்தக் கணிப்பில் இதுவரை மாற்றம் எதுவும் இல்லை.
தனியார் வானிலை ஆய்வாளர் பிரதீப் ஜான் சமூக ஊடகப் பக்கங்களில் புயல் குறித்து தொடர்ச்சியாக அறிவிப்புகளை வெளியிட்டு வருகிறார். சமீபத்திய அறிவிப்பில் அடுத்த 24 மணி நேரத்துக்கான நிலவரம் குறித்து விளக்கியுள்ளார்.
"தமிழகக் கடலோரப் பகுதிகளை ஒட்டி புயல் நகரக்கூடும். ஞாயிறு மாலை ஆழ்ந்த காற்றழுத்தத் தாழ்வு மண்டலமாகச் சென்னை கடற்கரையை டிட்வா புயல் நெருங்கும். டெல்டா மாவட்டங்களில் கனமழை பெய்துள்ளது. குறிப்பாக நாகை மாவட்டத்தில் கடலை ஒட்டியுள்ள ஒரு சில பகுதிகளில் 175 முதல் 200 மி.மீ.-க்கு மேல் மழை பதிவாகியுள்ளது.
புயலானது டெல்டா மாவட்டங்களை ஒட்டியுள்ள கடல் பகுதிகளில் இருப்பதால், டெல்டா மாவட்டங்களில் மாலை வரை மழை தொடரும். இது படிப்படியாக கடலூர் நோக்கி நகரும். அடுத்து புதுச்சேரியில் மழைப் பொழிவு இருக்கும்.
சென்னை, திருவள்ளூர், காஞ்சிபுரம், செங்கல்பட்டில் மாலை/இரவு முதல் மழை அதிகரிக்கும். ஈசிஆர் பகுதிகளில் தொடங்கி படிப்படியாக நகர்ப் பகுதிகளில் மழை அதிகரிக்கத் தொடங்கும். தெற்குப் பகுதிகள்/செங்கல்பட்டில் மிதமானது முதல் கனமழையை எதிர்பார்க்கலாம். சென்னையைப் பொறுத்தவரை ஞாயிறு தான் மிகச் சிறப்பான நாள்.
திருவாரூர், தஞ்சாவூர், திருச்சி, பெரம்பலூர், அரியலூர், கடலூர் உள் பகுதிகள், விழுப்புரம் ஆகிய இடங்களில் கனமழைக்கு வாய்ப்பு. நாகை, மயிலாடுதுறை, கடலூர் மற்றும் புதுச்சேரியில் அடுத்த 24 மணி நேரத்தில் மிகக் கனமழைக்கு வாய்ப்பு. கடலூர், மயிலாடுதுறை, நாகை, புதுச்சேரியில் ஓரிரு இடங்களில் அதிகனமழை பெய்யக்கூடும்" என்று பிரதீப் ஜான் தனது பக்கங்களில் குறிப்பிட்டுள்ளார்.
இந்தப் புயலானது தற்போது சென்னைக்கு தெற்கே 380 கி.மீ. தொலைவில் மையம் கொண்டுள்ளதாக வானிலை ஆய்வு மையம் தெரிவித்துள்ளது.
Cyclone Ditwah to reach Chennai Coast on Sunday, says Tamil Nadu Weatherman Pradeep John
Cyclonic Storm Ditwah | Cyclone Ditwah | Ditwah | Cyclone | Chennai Rain | Cyclone Alert | Rain Alert |