சென்னை பூந்தமல்லி - போரூர் வழித்தடத்தில் மெட்ரோ ரயிலை இயக்குவதற்கான சோதனை வெற்றிகரமாக நிறைவடைந்துள்ளதாக சென்னை மெட்ரோ ரயில் நிறுவனம் அறிவித்துள்ளது.
சென்னையில் இரண்டாம் கட்ட மெட்ரோ ரயில் திட்டத்தின் கீழ், நான்காவது வழித்தடத்தில் முதற்கட்டமாக பூந்தமல்லி புறவழிச் சாலை முதல் போரூர் வரை மெட்ரோ ரயிலை இயக்குவதற்கான நடவடிக்கைகள் மேற்கொள்ளப்பட்டு வருகின்றன. மெட்ரோ ரயில் பாலம் மற்றும் தண்டவாளத்தின் கட்டுமானப் பணிகள் நிறைவடைந்ததைத் தொடர்ந்து, அண்மைக் காலமாகவே ரயிலை இயக்கி சோதனை ஓட்டங்கள் நடைபெற்று வருகின்றன. இந்த ஆண்டு இறுதிக்குள் பூந்தமல்லி புறவழிச் சாலை மற்றும் போரூர் இடையிலான மெட்ரோ ரயில் சேவையை மக்கள் பயன்பாட்டுக்குக் கொண்டு வர சென்னை மெட்ரோ ரயில் நிறுவனம் திட்டமிட்டுள்ளது.
இந்த வழித்தடத்தில் மெட்ரோ ரயில் இயக்கப்படுவதிலிருந்து ஒவ்வொரு 6 மாதங்களுக்கு மெட்ரோ ரயில் சேவையின் வழித்தடம் மேலும் நீட்டிக்கப்பட்டு புதிய வழித்தடங்கள் மக்கள் பயன்பாட்டுக்கு வரும் என சென்னை மெட்ரோ ரயில் நிறுவனம் அறிவித்துள்ளது.
இந்நிலையில், பூந்தமல்லி புறவழிச் சாலை - போரூர் சந்திப்பு இடையிலான வழித்தடத்துக்கு ரயில்வே அமைச்சகத்தால் வழங்கப்படும் பாதுகாப்பு சான்றிதழைப் பெறுவதற்கான சோதனை நிறைவடைந்துள்ளதாக சென்னை மெட்ரோ ரயில் நிறுவனம் அறிவித்துள்ளது. திட்டமிடப்பட்ட தேதிக்கு முன்பே, இச்சோதனை நடத்தி முடிக்கப்பட்டுள்ளதாகவும் சென்னை மெட்ரோ ரயில் நிறுவனம் அறிவித்துள்ளது.
இதுதொடர்பாக, சென்னை மெட்ரோ ரயில் நிறுவனம் சார்பில் வெளியிடப்பட்டுள்ள அறிக்கையில் தெரிவிக்கப்பட்டுள்ளதாவது:
"சென்னை மெட்ரோ இரயில் நிறுவனம், இரண்டாம் கட்ட திட்டத்தின் கீழ், வழித்தடம் 4-ல் பூந்தமல்லி புறவழிச்சாலை முதல் போரூர் சந்திப்பு மெட்ரோ நிலையம் வரை மெட்ரோ இரயில்கள் மற்றும் வழித்தடங்களுக்கு பாதுகாப்பு சான்றிதழ் பெறுவதற்கான சோதனைகளை நிறைவு செய்துள்ளது.
இந்தச் சோதனைகள் மெட்ரோ இரயில் பெட்டிகளுக்கான சான்றிதழைப் பெறுவதற்குப் பின்பற்றப்படும் நடைமுறைகளின்படி, இரயில்வே அமைச்சகத்தின் கீழ் இயங்கும் இந்திய இரயில்வே ஆராய்ச்சி வடிவமைப்பு மற்றும் தர நிர்ணய அமைப்பை (RDSO - Research Designs and Standards Organisation) சேர்ந்த அதிகாரிகள் குழுவால் நடத்தப்பட்டது.
ஆகஸ்ட் 16, 2025 அன்று தொடங்கிய இந்தச் சோதனைகளில் மணிக்கு 90 கி.மீ. வேகத்தில் மெட்ரோ இரயில்கள் இயக்கப்பட்டு பயணிகளின் பயண வசதி மதிப்பீடு செய்யப்பட்டது. அத்துடன், வழித்தடத்தில் இரயில்களின் இழுவை மற்றும் பிரேக்கிங் செயல்திறன் (verification of traction and braking performance) பற்றிய விரிவான சரிபார்ப்பும் செய்யப்பட்டது.
கீழே கொடுக்கப்பட்டுள்ள காரணிகளின் அடிப்படையில் மதிப்பீடு செய்யப்பட்டுள்ளது:
பயணத் தரம் (Ride quality): மெட்ரோ இரயிலில் பயணிப்பது பயணிகளுக்கு எவ்வளவு வசதியானது என்பதை அறிய, மெட்ரோ இரயில் பெட்டிகள் மற்றும் தண்டவாளத்தின் தரம் மதிப்பீடு செய்யப்பட்டது.
பயணிகளின் பாதுகாப்பு (Passenger Safety): மின்சாரம், காற்றழுத்தம் மற்றும் அவசர காலங்களில் பயன்படுத்தப்படும் பிரேக் போன்ற பாதுகாப்பு அம்சங்கள் மதிப்பீடு செய்யப்பட்டது. இதில், பிரேக் அமைப்பு மற்றும் ஒட்டுமொத்த இரயில் கட்டுமானமும் பயணிகளுக்கு பாதுகாப்பான பயணத்தை வழங்குகிறதா என்பதை அறிக்கை சரிபார்க்கிறது.
மெட்ரோ இரயில் பெட்டிகளைத் தயாரிக்கும்போது, அதன் வடிவமைப்பு அம்சங்கள் பின்பற்றப்பட்டுள்ளன என்பதை இந்த வெற்றிகரமான சோதனைகள் நிரூபிக்கின்றன. மேலும், திட்டமிடப்பட்ட தேதிக்கு முன்னதாகவே சோதனைகள் நிறைவடைந்துள்ளன. இது சென்னை மெட்ரோ இரயில் நிறுவனம் பாதுகாப்பு மற்றும் தர நிலைகளை பின்பற்றியுள்ளது என்பதை நிரூபிக்கிறது" என்று தெரிவிக்கப்பட்டுள்ளது.
பூந்தமல்லி புறவழிச் சாலை மற்றும் போரூர் சந்திப்பு இடையிலான வழித்தடத்தில் ரயில் நிலையங்களை அமைக்கும் பணிகள் மும்முரமாக நடைபெற்று வருகின்றன. அடுத்தக்கட்டமாக அடுத்தாண்டு ஜூன் அருகே, இந்த சேவையானது பூந்தமல்லி புறவழிச் சாலை முதல் கோடம்பாக்கம் வரை நீட்டிக்கப்படும் என எதிர்பார்க்கப்படுகிறது.
Chennai Metro Rail | Chennai Metro | RDSO | Railway Ministry