மத்திய அரசுக்கு கண்டனம்: அதிமுக தீர்மானம் நிறைவேற்றம்!

அதிமுக அவசர செயற்குழுக் கூட்டத்தில் தமிழ்நாடு அரசு மற்றும் மத்திய அரசைக் கண்டித்து தீர்மானங்கள் நிறைவேற்றப்பட்டுள்ளன.

சென்னை ராயப்பேட்டையில் உள்ள அதிமுக தலைமை அலுவலகத்தில் இன்று அதிமுகவின் அவைத் தலைவர் தமிழ்மகன் உசேன் தலைமையில் மற்றும் அதிமுக பொதுச்செயலாளர் எடப்பாடி பழனிசாமி ஒருங்கிணைக்க நடைபெற்ற கழக அவசர செயற்குழு கூட்டத்தில் பல்வேறு தீர்மானங்கள் நிறைவேற்றப்பட்டன.

இதில், மத்திய நிதிநிலை அறிக்கையில், தமிழ்நாட்டிற்குத் தேவையான திட்டங்களை அறிவிக்காததற்கும், போதுமான நிதியை ஒதுக்காததற்கும் மத்திய அரசுக்கு கண்டனம் தெரிவிக்கப்பட்டுள்ளது.

அதிமுகவால் நிறைவேற்றப்பட்ட தீர்மானங்கள்

* நியாய விலைக் கடைகளில் அத்தியாவசியப் பொருட்கள் வழங்காத விடியா திமுக அரசுக்கு கடும் கண்டனம்.

* விலையில்லா வேட்டி, சேலை வழங்குவதிலும், விலையில்லா பள்ளிச் சீருடைகள் வழங்குவதிலும் மெத்தனப் போக்கோடு இருந்து வரும் விடியா திமுக அரசுக்கு கடும் கண்டனம்.

* மக்கள் நலன் கருதி மின்கட்டண உயர்வை ரத்து செய்திடவும், மாதாந்திர மின் கணக்கீட்டு முறையை அமல்படுத்திடவும் விடியா திமுக அரசை வலியுறுத்தல்.

* தமிழ் நாட்டின் ஜீவாதார உரிமைகளைக் காப்பாற்றத் தவறிய விடியா திமுக அரசின் மெத்தனப் போக்கிற்கு கடும் கண்டனம்.

* மக்கள் நலன் கருதி, கழக ஆட்சியில் செயல்படுத்தப்பட்டு வந்த உன்னதமான பல திட்டங்களை, அரசியல் காழ்ப்புணர்ச்சி காரணமாக முடக்கி செயலிழக்கச் செய்து வரும் விடியா திமுக அரசுக்கு கடும் கண்டனம்.

* தேர்தல் வாக்குறுதிகளை நிறைவேற்றாத விடியா திமுக அரசுக்கு கடும் கண்டனம்.

* மீனவர்கள் நலனில் அக்கறை செலுத்தாத விடியா திமுக அரசுக்கும், மத்திய அரசுக்கும் கடும் கண்டனம்.

* மத்திய நிதிநிலை அறிக்கையில், தமிழ் நாட்டிற்குத் தேவையான திட்டங்களை அறிவிக்காததற்கும்; போதுமான நிதியை ஒதுக்காததற்கும் மத்திய அரசுக்கு கண்டனம்.

* மருத்துவக் காப்பீடு பிரீமியத்திற்கு 18 சதவீத ஜிஎஸ்டி வரியை ரத்து செய்ய மத்திய அரசை வலியுறுத்தல்.

* வயநாடு நிலச் சரிவை, தேசியப் பேரிடராக அறிவிக்க மத்திய அரசை வலியுறுத்தல்.

* தமிழ் நாட்டில் சட்டம்-ஒழுங்கு சீர்குலைவுக்குக் காரணமான விடியா திமுக அரசுக்கு கடும் கண்டனம்.

* தொழில் வளர்ச்சி குன்றியதற்கு காரணங்களை அறிந்து, அவற்றை சரிவர நிவர்த்தி செய்யாத விடியா திமுக அரசுக்கு கண்டனம்.

* நிர்வாகத் திறமையின்மை காரணமாக, கடன்மேல் கடன் வாங்கியும், வரிமேல் வரி விதித்தும், மக்களை கடனாளியாக்கியதுதான் விடியா திமுக அரசின் சாதனை.

* விடியா திமுக அரசின் மூன்றாண்டு கால ஆட்சி - ‘சாதனை ஆட்சி அல்ல, வேதனை ஆட்சியே’.