காங்கிரஸின் ஊழலால் ஏற்பட்ட காயங்களை எங்கள் அரசு குணப்படுத்தி வருகிறது என்று பிரதமர் மோடி பேசினார்.
ராஜஸ்தான் மாநிலத்திற்குச் சுற்றுப் பயணம் மேற்கொண்டுள்ள பிரதமர் மோடி, அங்கு பல நலத்திட்டங்களுக்கு அடிக்கல் நாட்டினார். இரண்டு வந்தே பாரத் ரயில்களைத் தொடங்கி வைத்தார். அத்துடன் 15,000 பேருக்கு அரசு வேலைவாய்ப்புக்கான சான்றிதழ்களைப் வழங்கினார். அதன் பின் நிகழ்ச்சியில் அவர் பேசியதாவது:-
”நவராத்திரியின் போது சக்தியின் ஒன்பது வடிவங்கள் வழிபடப்படுகின்றன. இன்று, 'உர்ஜா சக்தி' அதாவது மின்சார உற்பத்தியுடன் தொடர்புடைய ஒரு நிகழ்வு நடைபெறுகிறது. இந்தியாவின் மின்சார உற்பத்தி திறன்களின் புதிய அத்தியாயம் எழுதப்பட்டுள்ளது. ரூ.90,000 கோடி மதிப்பிலான மின்சாரத் திட்டங்கள் இன்று தொடங்கப்பட்டுள்ளன. ஆனால், காங்கிரஸ் ஒருபோதும் மின்சாரத்தின் முக்கியத்துவத்தை கவனிக்கவில்லை.
2014-ல் நான் பதவியேற்றபோது நாட்டில் 2.5 கோடி வீடுகளுக்கு மின்சார இணைப்பு இல்லை. சுதந்திரம் அடைந்து 70 ஆண்டுகளுக்குப் பிறகும், 18,000 கிராமங்களில் மின் கம்பங்கள் இல்லை. முக்கிய நகரங்கள் பல மணிநேர மின்வெட்டை எதிர்கொண்டன. கிராமங்களில் 4-5 மணி நேர மின்சார இணைப்பே கொண்டாடப்பட்டது. இந்த நிலையை மாற்ற எங்கள் அரசு முடிவு செய்தது. இந்தியாவில் உள்ள ஒவ்வொரு கிராமத்திற்கும் மின்சாரம் வழங்கினோம். 2.5 கோடி வீடுகளுக்கு இலவச மின் இணைப்புகளை வழங்கினோம்.
காங்கிரஸின் ஊழலால் ஏற்பட்ட காயங்களை எங்கள் அரசு குணப்படுத்தி வருகிறது. காங்கிரஸ் அரசாங்கத்தின் கீழ் ராஜஸ்தான் ஊழல் குற்றங்களின் மையமாக மாறியது. ஜல் ஜீவன் திட்டமும் ஊழலுக்காக தியாகம் செய்யப்பட்டது. பெண்களுக்கு எதிரான குற்றங்கள் உச்சத்தில் இருந்தன. பாலியல் வன்கொடுமை செய்பவர்கள் பாதுகாக்கப்பட்டனர். பன்ஸ்வாரா, துங்கர்பூர் மற்றும் பிரதாப்கர் போன்ற பகுதிகளில் குற்றங்களும் சட்டவிரோத மதுபான வணிகமும் செழித்து வளர்ந்தன. ஆனால் பாஜகவுக்கு ஒரு வாய்ப்பு வழங்கப்பட்டபோது, நாங்கள் சட்டம் ஒழுங்கை வலுப்படுத்தினோம். புதிய திட்டங்கள் தொடங்கப்பட்டன. காங்கிரஸ் எப்போதும் ஆதிவாசி சமூகத்தை புறக்கணித்தது. அவர்களால் அவர்களின் தேவைகளை ஒருபோதும் புரிந்து கொள்ள முடியவில்லை. பாஜக அரசு ஆதிவாசி சமூகத்திற்கு முன்னுரிமை அளித்து தனி அமைச்சகத்தை நிறுவியது. அடல் ஜியின் ஆட்சிக் காலத்தில் முதன்முறையாக பழங்குடி அமைச்சகம் உருவாக்கப்பட்டது... காங்கிரஸ் ஆட்சிக் காலத்தில் பழங்குடிப் பகுதிகள் இவ்வளவு பெரிய திட்டங்களைப் பெற முடியும் என்று யாராலும் நினைத்துப் பார்க்க முடியவில்லை.
காங்கிரஸ் குடிமக்களைச் சுரண்டுவதில் மும்முரமாக இருந்தது. அவர்கள் நாட்டு மக்களைக் கொள்ளையடித்துக் கொண்டிருந்தனர். வரி மற்றும் பணவீக்கம் விண்ணை முட்டும் அளவுக்கு உயர்ந்தது. நமது அரசாங்கம் காங்கிரசின் கொள்ளையைத் தடுத்தது. அவர்களின் கோபத்திற்குக் காரணமும் இதுதான். 2017-ல் ஜிஎஸ்டியைக் கொண்டு வந்து நாட்டை வரி மற்றும் சுங்கத்தின் முட்டுக் கட்டைகளிலிருந்து விடுவித்தோம். இப்போது, நவராத்திரியின் முதல் நாளில் ஜிஎஸ்டி சீர்திருத்தங்கள் செயல்படுத்தப்பட்டன. முழு நாடும் ஜிஎஸ்டி பச்சத் உற்சவத்தைக் கொண்டாடுகிறது.
நமது நோக்கம் சுயசார்பு இந்தியாதான். அதன் அது சுதேசி என்ற மந்திரத்தின் மூலம் பெறப்படும். நம் நாட்டில் உற்பத்தி செய்யப்படும் எதுவும் சுதேசிதான், எந்த நாட்டைச் சேர்ந்த நிறுவனமாக இருந்தாலும் சரி.”
இவ்வாறு பேசினார்.