பிஹார் சட்டப்பேரவைத் தேர்தலில் தேசிய ஜனநாயகக் கூட்டணி சார்பில் பாஜக மற்றும் ஐக்கிய ஜனதா தளம் தலா 101 இடங்களில் போட்டியிடுவதாக அதிகாரபூர்வமாக அறிவிக்கப்பட்டுள்ளது.
பிஹாரிலுள்ள 243 சட்டப்பேரவைத் தொகுதிகளுக்கு இரு கட்டங்களாக வாக்குப்பதிவு நடைபெறுகிறது. முதற்கட்ட வாக்குப்பதிவு நவம்பர் 6 அன்றும் இரண்டாம் காட்ட வாக்குப்பதிவு நவம்பர் 11 அன்றும் நடைபெறுகிறது. நவம்பர் 14 அன்று வாக்கு எண்ணிக்கை நடைபெறுகிறது.
பாஜக, பிஹார் முதல்வர் நிதிஷ் குமார் தலைமையிலான ஐக்கிய ஜனதா தளம் தேசிய ஜனநாயகக் கூட்டணியாகப் போட்டியிடுகின்றன. சிராக் பாஸ்வானின் லோக் ஜனசக்தியும் (ராம் விலாஸ்) தேசிய ஜனநாயகக் கூட்டணியில் இணைந்து போட்டியிடும் என எதிர்பார்க்கப்பட்டு வந்தது.
இந்நிலையில் தான் தொகுதிப் பங்கீட்டை இறுதி செய்துள்ளது தேசிய ஜனநாயகக் கூட்டணி. பாஜக மற்றும் நிதிஷ் குமாரின் ஐக்கிய ஜனதா தளம் தலா 101 தொகுதிகளில் போட்டியிடுகின்றன.
தேசிய ஜனநாயகக் கூட்டணி - தொகுதிப் பங்கீடு
பாஜக - 101 தொகுதிகள்
ஐக்கிய ஜனதா தளம் (ஜேடியு) - 101 தொகுதிகள்
லோக் ஜனசக்தி (ராம் விலாஸ்) - 29 தொகுதிகள்
ராஷ்ட்ரீய லோக் மோர்ச்சா - 6 தொகுதிகள்
ஹிந்துஸ்தானி அவாம் மோர்ச்சா - 6 தொகுதிகள்
2020 சட்டப்பேரவைத் தேர்தலில் ஐக்கிய ஜனதா தளம் 115 தொகுதிகளிலும் பாஜக 110 தொகுதிகளிலும் போட்டியிட்டன. பாஜக ஆதரவு நிலைப்பாட்டிலிருந்த சிராக் பாஸ்வானின் லோக் ஜனசக்தி 2020 சட்டப்பேரவைத் தேர்தலில் 135 தொகுதிகளில் தனித்துப் போட்டியிட்டார். நிதிஷ் குமாரை விமர்சித்து வந்தார். தேசிய ஜனநாயகக் கூட்டணியில் இணைந்துள்ளதன் மூலம், இம்முறை 29 தொகுதிகளில் மட்டுமே போட்டியிடுகிறது.
ராஷ்ட்ரீய ஜனதா தளம் மற்றும் காங்கிரஸ் கூட்டணியான மெகா கூட்டணியின் தொகுதிப் பங்கீடு இன்னும் இறுதி செய்யப்படாமல் உள்ளது.
Bihar Election | Bihar Elections | Bihar Assembly Election | Bihar Assembly Elections | NDA | BJP | JDU | Nitish Kumar | Chirag Paswan | Bihar Election 2025 | Bihar Assembly Election 2025 |