https://www.instagram.com/ayush_m255
விளையாட்டு

சிஎஸ்கே தேர்வு செய்த 17 வயது வீரர்: யார் இந்த ஆயுஷ் மாத்ரே?

மும்பைக்காக ரஞ்சியில் விளையாடத் தொடங்கிய ஆயுஷ் மாத்ரே திரும்பிப் பார்க்கவே இல்லை.

கிழக்கு நியூஸ்

சென்னை சூப்பர் கிங்ஸ் கேப்டன் ருதுராஜ் கெயிக்வாட் காயம் காரணமாக ஐபிஎல் 2025 போட்டியிலிருந்து விலகியுள்ளார். இந்நிலையில் ருதுராஜுக்குப் பதிலாக மும்பையைச் சேர்ந்த 17 வயது ஆயுஷ் மாத்ரேவை சிஎஸ்கே தேர்வு செய்துள்ளது.

இந்தியாவில் எத்தனையோ வீரர்கள் இருந்தும் இந்த இளம் வீரரை சிஎஸ்கே ஏன் தேர்வு செய்தது?

2007-ல் பிறந்த மாத்ரே, முதல் தர கிரிக்கெட்டில் மும்பைக்காக 9 ஆட்டங்களில் விளையாடி இரு சதங்கள் உள்பட 504 ரன்கள் எடுத்துள்ளார். லிஸ்ட் ஏ கிரிக்கெட்டில் 7 ஆட்டங்களில் விளையாடி 2 சதங்களுடன் 458 ரன்கள் விளாசியுள்ளார். 50 ஓவர் கிரிக்கெட்டிலேயே அவருடைய ஸ்டிரைக் ரேட் 135.50 என்பது தான் சிஎஸ்கே அவரைத் தேர்வு செய்ய முக்கியக் காரணமாக அமைந்துள்ளது. கடந்த டிசம்பரில் நாகாலாந்துக்கு எதிராக 117 பந்துகளில் 181 ரன்கள் குவித்ததன் மூலம், லிஸ்ட் ஏ கிரிக்கெட்டில் ஓர் இன்னிங்ஸில் 150-க்கும் மேற்பட்ட ரன்கள் எடுத்த இளம் வீரர் என்ற யஷஸ்வி ஜெயிஸ்வால் சாதனையை அவர் முறியடித்தார். இந்திய இளையோர் அணிக்காக ஆசியக் கோப்பையில் 3 ஆட்டங்களில் விளையாடியுள்ள மாத்ரே, இதுவரை டி20யில் விளையாடியதே கிடையாது.

மும்பையிலிருந்து வரும் கிரிக்கெட் வீரர்கள் படும் கஷ்டங்களை இவரும் கடந்துதான் இந்த இடத்தை அடைந்துள்ளார். மும்பைக்கு வெளியே விராரிலிருந்து வான்கடே மைதானத்துக்கு அருகில் உள்ள சர்ச்கேட்டுக்குத் தினமும் 80 கி.மீ. தூரம் ரயிலில் பயணம் செய்து பயிற்சி எடுத்துள்ளார் மாத்ரே.

5 வயதிலிருந்து கிரிக்கெட் விளையாடும் மாத்ரே, பள்ளி, கிளப் கிரிக்கெட்டில் ரன்கள் குவித்து 15 வயதிலிருந்து வெளியில் தெரியத் தொடங்கினார். பள்ளி மாணவனாக இருக்கும்போதே டிசம்பர் 2023-ல் மும்பை 23 வயதுக்குட்பட்டோருக்கான அணியில் இடம்பிடித்தார் மாத்ரே. இப்படிக் கிடைத்த வாய்ப்புகளில் எல்லாம் ரன்கள் குவித்து வந்ததால் இரானி கோப்பையில் மும்பை அணி சார்பாக ரெஸ்ட் ஆஃப் இந்தியாவுக்கு எதிராக விளையாடும் வாய்ப்பு மாத்ரேவுக்குக் கிடைத்தது. முஷீர் கானுக்கு ஏற்பட்ட விபத்து இந்த வாய்ப்பை 17 வயதிலேயே அவருக்கு ஏற்படுத்தித் தந்தது.

அதிலிருந்து மும்பைக்காக ரஞ்சியில் விளையாடத் தொடங்கிய ஆயுஷ் மாத்ரே திரும்பிப் பார்க்கவே இல்லை. இன்று சிஎஸ்கேவின் பெருமைமிக்க இளம் வீரர்களில் ஒருவராக அணியில் இடம்பிடித்துள்ளார்.