அக்டோபரில் ஆஸி. செல்லும் இந்திய அணி!

2026 டி20 உலகக் கோப்பைக்கு முன்பு இந்திய கிரிக்கெட் அணி ஒருநாள் மற்றும் டி20 தொடர்களில் விளையாடுவதற்காக ஆஸ்திரேலியா செல்கிறது.

2025-26-ம் ஆண்டுக்கான உள்நாட்டு கிரிக்கெட் தொடர்களுக்கான அட்டவணையை ஆஸ்திரேலிய கிரிக்கெட் வாரியம் நேற்று வெளியிட்டது. இந்தத் திட்டத்தின்படி, இந்திய ஆடவர் கிரிக்கெட் அணி அக்டோபரில் ஆஸ்திரேலியாவுக்குப் பயணம் மேற்கொள்கிறது.

முதலில் 3 ஆட்டங்கள் கொண்ட ஒருநாள் தொடரில் இந்தியா விளையாடுகிறது. அக்டோபர் 19 அன்று பெர்த்தில் ஒருநாள் தொடர் தொடங்குகிறது. அக்டோபர் 23-ல் அடிலெய்டில் இரண்டாவது ஒருநாள் ஆட்டமும், அக்டோபர் 25-ல் சிட்னியில் மூன்றாவது ஒருநாள் ஆட்டமும் நடைபெறுகின்றன.

இதைத் தொடர்ந்து, 5 ஆட்டங்கள் கொண்ட டி20 தொடரில் இந்தியா விளையாடுகிறது. முதல் ஆட்டம் கான்பெராவிலும் கடைசி டி20 ஆட்டம் பிரிஸ்பேனில் நவம்பர் 8 அன்றும் நடைபெறுகின்றன.

2026 டி20 உலகக் கோப்பையை இந்தியா மற்றும் இலங்கை இணைந்து நடத்துகின்றன. இதற்குத் தயாராகும் வகையில் இந்த டி20 தொடர் அமையும் என எதிர்பார்க்கப்படுகிறது.

ஒருநாள் தொடர்

• முதல் ஒருநாள் - அக்டோபர் 19, பெர்த்

• இரண்டாவது ஒருநாள் - அக்டோபர் 23, அடிலெய்ட்

• மூன்றாவது ஒருநாள் - அக்டோபர் 25, சிட்னி

டி20 தொடர்

• முதல் டி20 - அக்டோபர் 29, கான்பெரா

• இரண்டாவது டி20 - அக்டோபர் 31, மெல்போர்ன்

• மூன்றாவது டி20 - நவம்பர் 2, ஓவல்

• நான்காவது டி20 - நவம்பர் 6, கோல்ட் கோஸ்ட்

• ஐந்தாவது டி20 - நவம்பர் 8, பிரிஸ்பேன்

இந்தியாவுடனான தொடர்களுக்குப் பிறகு நவம்பர் 21, 2025 முதல் ஜனவரி 8, 2026 வரை ஆஷஸ் தொடரில் விளையாடுகிறது ஆஸ்திரேலியா.