ரஜினியின் 173-வது படத்தை சுந்தர். சி இயக்கவுள்ளதாகவும் அதை ராஜ்கமல் ஃபிலிம்ஸ் தயாரிக்கவுள்ளதாகவும் கமல் ஹாசன் அதிகாரபூர்வமாக அறிவித்துள்ளார்.
ரஜினிகாந்த் நடித்த கூலி திரைப்படம் கடந்த ஆகஸ்டில் வெளியானது. தற்போது ஜெயிலர் 2 படத்தில் நடித்து வருகிறார். இதைத் தொடர்ந்து, ராஜ்கமல் ஃபிலிம்ஸ் தயாரிப்பில் ரஜினி - கமல் இணைந்து ஒரு படத்தில் நடிக்கவுள்ளதாகத் தகவல்கள் வெளியாகின.
இப்படத்தை இயக்குநர்கள் நெல்சன், லோகேஷ் கனகராஜ், பிரதீப் ரங்கநாதன் ஆகியோரில் யாரோ ஒருவர் இயக்கவுள்ளதாகப் பேச்சுகள் அடிபட்டன. மேலும், இப்படத்துக்கு நடுவே சுந்தர். சி இயக்கத்தில் சிறிய பொருட்செலவில் ஒரு படத்தில் நடிக்க ரஜினி திட்டமிட்டிருப்பதாகவும் சினிமா வட்டாரங்களில் பேசப்பட்டு வந்தன.
இந்த நிலையில் தான் ரஜினியின் அடுத்த படம் பற்றிய அதிகாரபூர்வ அறிவிப்பு வெளியாகியிருக்கிறது. ஒட்டுமொத்த தமிழ் சினிமாவும் எதிர்பார்த்த மிக முக்கியமான கூட்டணி ரஜினி - கமல். இது தற்போதைய நிலையில் நடிப்பில் சாத்தியமாகவில்லை. ஆனால், தயாரிப்பில் சாத்தியமாகியுள்ளது.
ரஜினியின் 173-வது படத்தை கமல் ஹாசனின் ராஜ்கமல் ஃபிலிம்ஸ் தயாரிக்கிறது. இயக்குநர் சுந்தர். சி இப்படத்தை இயக்குகிறார். 50 ஆண்டுகால நட்பு மற்றும் சகோதரத்துவத்தைக் கொண்டாடும் விதமாக இந்த இணைப்பு நிகழ்ந்துள்ளது என கமல் ஹாசன் தனது அறிவிப்பில் குறிப்பிட்டுள்ளார்.
'தலைவர் 173' எனத் தற்காலிகமாகப் பெயர் சூட்டப்பட்டுள்ள இப்படத்தை ரெட் ஜெயன்ட் மூவிஸ் 2027 பொங்கலுக்கு வெளியிடுகிறது. ரெட் ஜெயன்ட் மூவிஸ் வெளியிடுவதையும் அதிகாரபூர்வமாக அறிவித்துள்ளார் கமல் ஹாசன்.
சுந்தர். சி அருணாச்சலம் படத்தில் ரஜினியையும் அன்பே சிவம் படத்தில் கமல் ஹாசனையும் இயக்கியுள்ளார்.
Sundar C to direct Rajinikanth in Thalaivar 173 produced by Kamal Haasan's Raajkamal Films International
Kamal Haasan | Rajinikanth | Raajkamal Films International | Red Giant Movies | Sundar C | Thalaivar 173 |